| ᠥᠬᠢᠨ ᠤ ᠮᠢᠨᠢ ᠰᠤᠷᠭᠠᠭᠤᠯᠢ ᠨᠢ ᠴᠤᠭᠯᠠᠬᠤ ᠪᠤᠯᠤᠭᠰᠠᠨ ᠲᠤᠯᠠ ᠲᠡᠭᠦᠨ ᠲᠠᠢ ᠬᠠᠮᠲᠤ ᠨᠤᠮ ᠤᠨ | ᠳᠡᠯᠭᠡᠭᠦᠷ ᠢᠶᠠᠷ ᠶᠠᠪᠤᠵᠤ ᠪᠤᠯᠤᠳ ᠪᠢᠷ᠂ ᠬᠠᠷᠠᠨᠳᠠ᠂ ᠱᠤᠭᠤᠮ ᠁ ᠵᠡᠷᠭᠡ ᠪᠢᠴᠢᠭ ᠤᠨ ᠬᠡᠷᠡᠭᠰᠡᠯ ᠤᠳ ᠢ | ᠦᠵᠡᠯᠡ᠃ ᠤᠳᠤ ᠶᠢᠨ ᠪᠢᠷ ᠪᠡᠬᠡᠰ ᠤᠤᠯ ᠤᠨ ᠬᠢ ᠶᠢ ᠪᠤᠳᠤᠪᠠᠯ ᠪᠦᠷ ᠰᠠᠶᠢᠬᠠᠨ ᠪᠤᠯᠴᠢᠬᠠᠵᠠᠢ᠃ ᠳᠡᠯᠭᠡᠭᠦᠷ ᠤᠨ | ᠰᠢᠯᠦᠨ ᠯᠠᠩᠭᠦᠢ ᠳᠤ ᠵᠡᠷᠭᠡᠯᠡᠭᠦᠯᠦᠨ ᠲᠠᠯᠪᠢᠭᠰᠠᠨ ᠥᠩᠭᠡ ᠥᠩᠭᠡ ᠶᠢᠨ ᠪᠤᠯᠤᠳ ᠪᠢᠷ ᠢ ᠬᠠᠷᠠᠭᠠᠳ ᠡᠷᠬᠡ ᠦᠭᠡᠢ | ᠪᠠᠭᠠ ᠨᠠᠰᠤ ᠪᠠᠨ ᠰᠠᠨᠠᠪᠠ᠃ | ᠤᠳᠤ ᠠᠴᠠ ᠭᠤᠴᠢᠨ ᠵᠢᠯ ᠤᠨ ᠡᠮᠦᠨᠡ ᠠᠷᠪᠠᠲᠠᠢ ᠪᠢ ᠬᠤᠰᠢᠭᠤᠨ ᠤ ᠨᠢᠭᠡᠳᠦᠭᠡᠷ ᠪᠦᠷᠢᠨ ᠪᠠᠷᠠᠭᠠᠲᠤ | ᠳᠡᠯᠭᠡᠭᠦᠷ ᠤᠨ ᠯᠠᠩᠭᠦᠢ ᠪᠠᠷ ᠮᠥᠨ ᠢᠩᠭᠢᠵᠦ ᠱᠤᠬᠤᠭᠤᠷᠬᠠᠨ ᠪᠠᠶᠢᠵᠤ ᠪᠢᠯᠡ᠃ ᠲᠡᠷᠡ ᠦᠶᠡ ᠳᠤ ᠪᠤᠯᠤᠳ ᠪᠢᠷ ᠢ | ᠮᠥᠨ ᠳᠡᠯᠭᠡᠭᠦᠷ ᠤᠨ ᠯᠠᠩᠭᠦᠢ ᠳᠤ ᠵᠡᠷᠭᠡᠯᠡᠭᠦᠯᠦᠨ ᠲᠠᠯᠪᠢᠳᠠᠭ ᠴᠤ ᠤᠳᠤ ᠶᠢᠨ ᠰᠢᠭ ᠡᠶᠢᠮᠦ ᠥᠩᠭᠡ ᠢᠯᠭᠠᠷᠠᠮᠠ | ᠪᠢᠰᠢ᠂ ᠬᠠᠷᠠ᠂ ᠨᠤᠭᠤᠭᠠᠨ᠂ ᠴᠠᠭᠠᠨ ᠭᠤᠷᠪᠠᠭ᠋ᠠᠨ ᠥᠩᠭᠡ ᠶᠢᠨ ᠪᠤᠯᠤᠳ ᠪᠢᠷ ᠪᠠᠶᠢᠭᠰᠠᠨ ᠰᠢᠭ ᠰᠠᠨᠠᠭᠳᠠᠵᠤ | ᠪᠠᠶᠢᠨᠠ᠃ ᠪᠢ ᠭᠤᠷᠪᠠᠳᠤᠭᠠᠷ ᠤᠨ ᠤ ᠰᠤᠷᠤᠭᠴᠢ ᠪᠤᠯᠤᠭᠰᠠᠨ ᠲᠤᠯᠠ ᠪᠠᠭᠰᠢ ᠪᠤᠯᠤᠳ ᠪᠢᠷ ᠬᠡᠷᠡᠭᠯᠡᠵᠦ ᠪᠤᠯᠤᠨᠠ | ᠭᠡᠰᠡᠨ᠃ ᠳᠡᠯᠭᠡᠭᠦᠷ ᠤᠨ ᠯᠠᠩᠭᠦᠢ ᠲᠤᠳᠤᠷᠠᠬᠢ ᠰᠤᠷᠤᠭᠴᠢ ᠶᠢᠨ ᠬᠡᠷᠡᠭᠯᠡᠳᠡᠭ ᠪᠤᠯᠤᠳ ᠪᠢᠷ ᠤᠨ ᠤᠯᠠᠩᠬᠢ ᠨᠢ ᠨᠢᠭᠡ | ᠲᠥᠭᠦᠷᠢᠭ ᠪᠤᠶᠤ ᠲᠥᠭᠦᠷᠢᠭ ᠲᠠᠪᠢ᠃ ᠪᠢ ᠨᠢᠭᠡ ᠲᠥᠭᠦᠷᠢᠭ ᠭᠠᠷᠭᠠᠵᠤ ᠭᠦᠨ ᠨᠤᠭᠤᠭᠠᠨ ᠥᠩᠭᠡᠲᠡᠢ ᠪᠤᠯᠤᠳ | ᠪᠢᠷ ᠠᠴᠠ ᠨᠢᠭᠡ ᠶᠢ ᠠᠪᠴᠤ᠂ ᠬᠥᠭᠡ ᠥᠩᠭᠡᠲᠡᠢ ᠪᠤᠳᠤᠭ ᠠᠴᠠ ᠨᠢᠭᠡ ᠯᠤᠩᠬᠤ ᠠᠪᠤᠪᠠ᠃ ᠮᠠᠨ ᠤ ᠠᠩᠭᠢ ᠶᠢᠨ | ᠨᠥᠬᠦᠳ ᠤᠨ ᠤᠯᠠᠩᠬᠢ ᠨᠢ ᠮᠥᠨ ᠨᠠᠳᠠ ᠲᠠᠢ ᠠᠳᠠᠯᠢᠬᠠᠨ ᠪᠤᠯᠤᠳ ᠪᠢᠷ ᠬᠡᠷᠡᠭᠯᠡᠵᠦ ᠡᠬᠢᠯᠡᠭᠰᠡᠨ ᠴᠤ ᠪᠤᠯᠤᠳ | ᠪᠢᠷ ᠲᠠᠢ ᠯᠤᠩᠬᠤ ᠲᠠᠢ ᠪᠠᠷᠢᠯᠳᠤᠭᠠᠳ ᠪᠤᠳᠤᠭ ᠢᠶᠠᠨ ᠠᠰᠬᠠᠬᠤ᠂ ᠪᠤᠯᠤᠳ ᠪᠢᠷ ᠤᠨ ᠢᠶᠠᠨ ᠦᠵᠦᠭᠦᠷ ᠢ ᠬᠤᠭᠤᠯᠬᠤ᠂ | ᠪᠤᠯᠤᠳ ᠪᠢᠷ ᠢᠶᠠᠨ ᠭᠠᠵᠠᠷ ᠪᠤᠯᠭᠠᠨ ᠳᠤ ︽ᠪᠠᠭᠠᠭᠠᠯᠭᠠᠬᠤ︾ ᠵᠡᠷᠭᠡ ᠪᠠᠷ ᠰᠢᠷᠦ᠋ᠢᠳᠠᠵᠠᠭᠠᠵᠤ ᠪᠠᠶᠢᠪᠠ᠃ | ᠤᠯᠳᠠᠭᠰᠠᠨ ᠪᠤᠯᠤᠳ ᠪᠢᠷ ᠮᠢᠨᠢ ᠬᠢᠮᠲᠠᠬᠠᠨ ᠡᠳ᠋ ᠪᠤᠯᠬᠤᠷ ᠪᠢᠴᠢᠵᠦ ᠪᠢᠴᠢᠵᠦ ᠪᠠᠶᠢᠲᠠᠯᠠ ᠪᠤᠳᠤᠭ ᠨᠢ ᠪᠠᠷᠠᠴᠢᠬᠠᠭᠠᠳ | ᠲᠠᠰᠤᠷᠠᠴᠢᠬᠠᠵᠤ ᠲᠥᠪᠡᠭᠳᠡᠬᠦᠯᠦᠨᠡ᠃ ᠠᠩᠬᠠ ᠳᠤᠮᠳᠠᠳᠤ ᠳᠤ ᠪᠠᠶᠢᠬᠤ ᠳᠤ ᠰᠢᠷᠡᠭᠡᠨ ᠤ ᠨᠠᠶᠢᠵᠠ ᠮᠢᠨᠢ ᠨᠠᠷᠢᠬᠠᠨ | ᠴᠡᠪᠡᠷ ᠭᠠᠷᠳᠠᠭ ᠮᠥᠷᠲᠡᠭᠡᠨ ᠪᠤᠳᠤᠭ ᠨᠢ ᠬᠠᠳᠠᠵᠤ ᠲᠠᠰᠤᠷᠠᠳᠠᠭ ᠦᠭᠡᠢ ᠭᠤᠶᠤ ᠪᠤᠯᠤᠳ ᠪᠢᠷ ᠲᠠᠢ ᠪᠠᠶᠢᠪᠠ᠃ | ᠦᠨᠡ ᠶᠢ ᠨᠢ ᠰᠤᠷᠠᠪᠠᠯ ᠨᠢᠮᠠᠨ ᠲᠥᠭᠦᠷᠢᠭ ᠭᠡᠵᠦ ᠪᠢᠯᠡ᠃ ᠪᠢ ᠴᠤ ᠲᠡᠶᠢᠮᠦ ᠪᠢᠷ ᠲᠠᠢ ᠪᠤᠯᠬᠤ ᠪᠠᠷ ᠲᠠᠰᠤ | ᠰᠶᠢᠳᠴᠦ᠂ ᠦᠳᠡ ᠶᠢᠨ ᠬᠤᠭᠤᠯᠠ᠂ ᠰᠤᠯᠠ ᠵᠠᠷᠤᠳᠠᠯ ᠮᠥᠩᠭᠦ ᠪᠠᠨ ᠠᠷᠪᠢᠯᠠᠭᠰᠠᠭᠠᠷ ᠪᠠᠶᠢᠭᠠᠳ ᠬᠤᠶᠠᠷ ᠰᠠᠷᠠ ᠶᠢᠨ | ᠳᠠᠷᠠᠭᠠ ᠥᠨᠥᠬᠢ ᠪᠢᠷ ᠢ ᠠᠪᠤᠪᠠ᠃ ᠦᠨᠡᠭᠡᠷ ᠨᠠᠷᠢᠨ ᠭᠠᠷᠳᠠᠭ ᠮᠥᠷᠲᠡᠭᠡᠨ ᠪᠤᠳᠤᠭ ᠨᠢ ᠲᠠᠰᠤᠷᠠᠳᠠᠭ ᠦᠭᠡᠢ — | ᠭᠡᠪᠡᠴᠦ ᠪᠢᠴᠢᠭᠰᠡᠨ ᠦᠰᠦᠭ ᠨᠢ ᠪᠠᠰᠠ ᠲᠡᠳᠦᠢ ᠰᠠᠶᠢᠬᠠᠨ ᠬᠠᠷᠠᠭᠳᠠᠭᠰᠠᠨ ᠦᠭᠡᠢ᠃ ᠰᠠᠶᠢᠨ ᠪᠤᠯᠤᠳ ᠪᠢᠷ | ᠴᠢᠬᠤᠯᠠ ᠭᠡᠬᠦᠯᠡᠷ ᠰᠠᠶᠢᠬᠠᠨ ᠪᠢᠴᠢᠬᠦ ᠡᠷᠳᠡᠮ ᠨᠡᠩ ᠴᠢᠬᠤᠯᠠ ᠰᠠᠨᠵᠠᠢ᠃ | ᠤᠳᠤ ᠪᠤᠳᠤᠬᠤ ᠳᠤ ᠥᠨᠳᠥᠷ ᠳᠤᠮᠳᠠᠳᠤ ᠳᠤ ᠤᠷᠤᠭᠠᠳ ᠡᠨᠡ ᠨᠠᠰᠤᠨ ᠤ ᠪᠠᠨ ᠪᠤᠯᠤᠳ ᠪᠢᠷ ᠢᠶᠠᠷ ᠪᠢᠴᠢᠳᠡᠭ | ᠦᠰᠦᠭ ᠤᠨ ᠢᠶᠠᠨ ᠬᠠᠭᠠᠰ ᠢ ᠨᠢ ᠪᠢᠴᠢᠭᠰᠡᠨ ᠪᠠᠶᠢᠵᠤ ᠮᠡᠳᠡᠬᠦ ᠶᠤᠮ᠃ ᠳᠤᠯᠤᠭᠠ ᠨᠢᠮᠠᠨ ᠬᠢᠴᠢᠶᠡᠯ ᠲᠥᠷᠥᠯ | ᠪᠦᠬᠦᠨ ᠤ ᠲᠡᠮᠳᠡᠭᠯᠡᠯ᠂ ᠳᠠᠰᠬᠠᠯ ᠬᠤᠶᠠᠷ ᠢ ᠪᠦᠷ ᠪᠤᠯᠤᠳ ᠪᠢᠷ ᠢᠶᠠᠷ ᠭᠦᠢᠴᠡᠳᠬᠡᠵᠦ ᠪᠠᠶᠢᠭᠰᠠᠨ ᠪᠦᠭᠡᠳ ᠵᠠᠪ | ᠴᠢᠯᠦᠭᠡ ᠪᠠᠷ ᠢᠶᠠᠨ ᠨᠠᠶᠢᠵᠠ ᠨᠥᠬᠦᠳ᠂ ᠠᠪᠤ ᠡᠵᠢ᠂ ᠦᠵᠦᠭ ᠤᠨ ᠨᠠᠶᠢᠵᠠ ᠨᠠᠷ ᠲᠠᠭᠠᠨ ᠵᠠᠬᠢᠳᠠᠯ ᠪᠢᠴᠢᠵᠦ | ᠪᠠᠶᠢᠭᠰᠠᠨ᠃ ᠡᠳᠦᠷ ᠪᠤᠯᠭᠠᠨ ᠪᠤᠯᠤᠳ ᠪᠢᠷ ᠠᠴᠠ ᠰᠠᠯᠵᠤ ᠪᠠᠶᠢᠭᠰᠠᠨ ᠦᠭᠡᠢ ᠭᠡᠪᠡᠯ ᠨᠢᠭᠡ ᠯᠡ ᠦᠭᠡ᠃ | ᠭᠠᠷ ᠲᠠᠭᠠᠨ ᠳᠠᠭᠠᠷᠠᠭᠰᠠᠨ ᠪᠤᠯᠤᠳ ᠪᠢᠷ ᠤᠯᠤᠭᠠᠳ ᠴᠠᠭᠠᠰᠤᠨ ᠳᠡᠭᠡᠭᠦᠷ ᠳᠠᠪᠬᠢᠭᠤᠯᠬᠤ ᠨᠢ ᠮᠥᠨ ᠨᠢᠭᠡ ᠶᠤᠰᠤᠨ ᠤ | ᠵᠤᠭᠠᠲᠠᠢ ᠶᠠᠪᠤᠳᠠᠯ ᠶᠤᠮ᠃ ᠤᠶᠤᠲᠠᠨ ᠪᠤᠯᠤᠭᠠᠳ ᠬᠠᠷᠢᠨ ᠪᠤᠯᠤᠳ ᠪᠢᠷ ᠢᠶᠠᠷ ᠪᠢᠴᠢᠬᠦ ᠮᠢᠨᠢ ᠴᠦᠬᠡᠷᠡᠵᠡᠢ᠃ | ᠠᠵᠢᠯ ᠳᠤ ᠭᠠᠷᠤᠭᠠᠳ ᠪᠤᠯᠤᠳ ᠪᠢᠷ ᠬᠡᠷᠡᠭᠯᠡᠬᠦ ᠮᠢᠨᠢ ᠨᠡᠩ ᠴᠥᠬᠡᠷᠡᠪᠡ᠃ ᠤᠴᠢᠷ ᠨᠢ ᠠᠵᠢᠯ ᠤᠨ ᠢᠶᠠᠨ | ᠤᠯᠠᠩᠬᠢ ᠶᠢ ᠨᠢ ᠺᠤᠮᠫᠢᠦ᠋ᠲᠤᠷ ᠢᠶᠠᠷ ᠪᠡᠶᠡᠯᠡᠭᠦᠯᠳᠡᠭ᠃ ᠭᠡᠪᠡᠴᠦ ᠪᠢ ᠥᠪᠡᠷ ᠢᠶᠠᠨ ᠪᠤᠯ ᠬᠦᠬᠡᠬᠤᠲᠠ ᠶᠢᠨ | ᠰᠤᠶᠤᠯ ᠤᠨ ᠵᠠᠬᠠ᠂ ᠥᠪᠥᠷ ᠮᠤᠩᠭᠤᠯ ᠤᠨ ᠶᠡᠭᠡ ᠰᠤᠷᠭᠠᠭᠤᠯᠢ ᠶᠢᠨ ᠵᠡᠭᠦᠨ ᠡᠭᠦᠳᠡᠨ ᠤ ᠳᠡᠨᠲᠡ ᠪᠠᠶᠢᠳᠠᠭ ᠪᠤᠯᠤᠳ | ᠪᠢᠷ ᠬᠤᠳᠠᠯᠳᠤᠳᠠᠭ ᠳᠡᠯᠭᠡᠭᠦᠷ ᠢᠶᠠᠷ ᠪᠠᠶᠢᠩᠭᠤ ᠶᠠᠪᠤᠳᠠᠭ᠃ ᠤᠴᠢᠬᠤ ᠪᠤᠯᠭᠠᠨ ᠲᠡᠨᠳᠡᠬᠢ ᠬᠦᠮᠦᠰ ᠲᠠᠢ ᠪᠤᠯᠤᠳ | ᠪᠢᠷ ᠤᠨ ᠲᠤᠬᠠᠢ ᠶᠠᠷᠢᠵᠤ᠂ ᠪᠤᠯᠤᠳ ᠪᠢᠷ ᠬᠤᠳᠠᠯᠳᠤᠨ ᠠᠪᠳᠠᠭ᠃ ᠠᠩᠬᠠ ᠡᠬᠢᠨ ᠳᠡᠭᠡᠨ ︽ᠪᠠᠭᠠᠲᠤᠷ︾ | ᠲᠡᠮᠳᠡᠭᠲᠦ ᠪᠤᠯᠤᠳ ᠪᠢᠷ ᠰᠢᠨᠡ ᠪᠥᠲᠥᠭᠡᠭᠲᠡᠭᠦᠨ ᠭᠠᠷᠪᠠᠯ ᠪᠢᠴᠢᠵᠦ ᠦᠵᠡᠳᠡᠭ ᠪᠦᠭᠡᠳ ᠲᠠᠭᠠᠯᠠᠭᠳᠠᠭᠰᠠᠨ ᠪᠢᠷ ᠢᠶᠠᠨ | ᠳᠠᠷᠦ᠋ᠢᠬᠠᠨ ᠠᠪᠳᠠᠭ᠃ ᠠᠪᠤᠭᠰᠠᠭᠠᠷ ᠪᠠᠶᠢᠲᠠᠯᠠ ᠠᠷᠪᠠᠨ ᠬᠡᠳᠦᠨ ᠵᠢᠯ ᠤᠨ ᠲᠤᠷᠰᠢ ᠠᠷᠪᠠᠭᠠᠳ ︽ᠪᠠᠭᠠᠲᠤᠷ︾ ᠲᠠᠢ | ᠪᠤᠯᠵᠠᠢ᠃ ᠪᠢᠷ ᠲᠠᠢ ᠪᠤᠯᠤᠯᠠ ᠭᠡᠳ ᠲᠡᠷᠡ ᠳᠤᠤᠷᠠ ᠨᠢ ᠠᠪᠴᠤ ᠬᠡᠷᠡᠭᠯᠡᠭᠡ ᠦᠭᠡᠢ᠂ ᠴᠡᠪᠡᠷᠯᠡᠵᠦ ᠠᠷᠴᠢᠭᠠᠳ | ᠬᠤᠷᠭᠤᠨ ᠳᠠᠭᠠᠨ ᠬᠢᠵᠦ ᠬᠠᠳᠠᠭᠠᠯᠠᠳᠠᠭ᠃ ᠭᠠᠷᠠᠭ ᠤᠨ ᠠᠮᠠᠷᠠᠯᠲᠠ ᠪᠤᠶᠤ ᠰᠡᠯᠡᠭᠦᠦ ᠴᠠᠭ ᠢᠶᠠᠷ ᠥᠨᠥᠬᠢ | ᠪᠢᠷ ᠤᠳ ᠢᠶᠠᠨ ᠭᠠᠷᠭᠠᠵᠤ ᠦᠵᠡᠨᠡ᠂ ᠬᠠᠮᠢᠭᠠ ᠠᠴᠠ ᠬᠤᠳᠠᠯᠳᠤᠨ ᠠᠪᠤᠭᠰᠠᠨ ᠵᠡᠷᠭᠡ ᠪᠠᠨ ᠤᠷᠮᠠᠲᠠᠶᠢᠬᠠᠨ | ᠡᠷᠭᠢᠴᠡᠭᠦᠯᠦᠨᠡ᠃ ᠬᠡᠳᠦᠨ ᠪᠤᠯᠤᠳ ᠪᠢᠷ ᠲᠠᠢ ᠪᠤᠯᠤᠭᠠᠳ ᠥᠪᠡᠷ ᠢ ᠪᠠᠨ ︽ᠪᠠᠶᠠᠨ︾ ᠪᠤᠯᠤᠭᠰᠠᠨ ᠢᠶᠠᠷ | ᠪᠤᠳᠤᠳᠠᠭ ᠢᠶᠠᠨ ᠦᠵᠡᠭᠦᠯᠡ ᠪᠢ ᠮᠥᠨ ᠯᠡ ᠬᠥᠭᠡᠷᠦᠬᠦᠢ ᠪᠢᠴᠢᠭ ᠤᠨ ᠬᠦᠮᠦᠨ ᠠᠵᠤᠭᠤ᠃ ᠰᠡᠭᠦᠯᠡᠷ ᠨᠢ ᠪᠠᠰᠠ | ᠠᠮᠤᠷᠢᠺᠡ ᠬᠢᠴᠡᠲᠡᠢ᠂ ᠭᠦ᠋ᠷᠮᠠᠨ ᠬᠢᠴᠡᠲᠡᠢ᠂ ᠶᠠᠫᠤᠨ ᠬᠢᠴᠡᠲᠡᠢ ᠬᠡᠳᠦᠨ ᠪᠢᠷ ᠢ ᠲᠤᠭᠤᠵᠤ ᠠᠪᠳᠠᠭ ᠪᠤᠯᠪᠠ᠃ | ᠭᠡᠬᠦ ᠳᠡᠭᠡᠨ ᠲᠡᠳᠡᠭᠡᠷ ᠪᠤᠯᠤᠳ ᠪᠢᠷ ᠮᠢᠨᠢ ᠠᠯᠲᠠ ᠮᠥᠩᠭᠦ ᠪᠠᠷ ᠬᠢᠭᠰᠡᠨ᠂ ︽ᠪᠢᠷ︾ ᠭᠡᠬᠦ ᠨᠡᠷᠡ ᠠᠴᠠ ᠪᠠᠨ | ᠳᠠᠪᠠᠭᠰᠠᠨ ᠶᠠᠭᠤᠮᠠ ᠪᠠᠶᠢᠬᠤ ᠦᠭᠡᠢ᠂ ᠪᠦᠷ ᠯᠡ ᠦᠰᠦᠭ ᠪᠢᠴᠢᠬᠦ ᠬᠡᠷᠡᠭᠰᠡᠯ᠃ ᠪᠢ ᠪᠢᠷ ᠢ ᠰᠤᠪᠤᠳ ᠡᠷᠳᠡᠨᠢ | ᠰᠢᠭᠢᠳᠬᠡᠨ ᠬᠢᠬᠦ ᠠᠳᠠᠯ ᠳᠤ ᠶᠠᠭ ᠳᠤᠷᠠ ᠦᠭᠡᠢ᠂ ᠪᠢᠷ ᠭᠡᠬᠦ ᠨᠡᠷᠡ ᠵᠢᠭᠠᠭᠰᠠᠨ ᠵᠦᠢᠯ ᠦᠭᠡᠷᠡ ᠶᠠᠭᠤᠮᠠ | ᠪᠤᠯᠴᠢᠬᠠᠬᠤ ᠪᠠᠷ ᠤᠳᠬᠠ ᠤᠷᠠᠯᠢᠭ ᠠᠴᠠ ᠬᠤᠯᠠᠳᠠᠭᠠᠳ ᠠᠯᠲᠠ ᠮᠥᠩᠬᠦ ᠪᠤᠯᠴᠢᠬᠠᠭᠰᠠᠨ ᠮᠡᠲᠦ᠃ | ᠪᠢ ᠪᠠᠰᠠ ᠬᠡᠳᠦᠨ ᠨᠠᠶᠢᠵᠠ ᠳᠠᠭᠠᠨ ᠪᠤᠯᠤᠳ ᠪᠢᠷ ᠪᠡᠯᠡᠭᠯᠡᠵᠦ ᠪᠠᠶᠢᠭᠰᠠᠨ᠃ ᠭᠡᠬᠦ ᠳᠡᠭᠡᠨ ᠶᠠᠮᠠᠷ ᠴᠤ ︽ᠡᠷᠳᠡᠨᠢ︾ | ᠪᠤᠯᠭᠠᠵᠤ ᠥᠭᠭᠦᠭᠰᠡᠨ ᠦᠭᠡᠢ᠂ ᠭᠠᠷ ᠤᠨ ᠠᠶᠠ ᠪᠠᠷ ᠢᠶᠠᠨ ᠪᠢᠴᠢᠳᠡᠭ ᠶᠠᠭᠤᠮᠠ ᠪᠠᠨ ᠪᠢᠴᠢᠬᠦ ᠶᠢᠨ ᠡᠷᠬᠡ | ᠴᠢᠯᠦᠭᠡ ᠶᠢ ᠡᠳ᠋ᠯᠡᠭᠦᠯᠬᠦ ᠭᠡᠳ ᠲᠡᠭᠡᠭᠰᠡᠨ ᠶᠤᠮ᠃ ᠲᠦᠷᠦᠭᠦᠦ ᠬᠡᠳᠦᠨ ᠡᠳᠦᠷ ᠨᠢᠭᠡ ᠨᠠᠶᠢᠵᠠ ᠲᠠᠢ ᠪᠠᠨ ᠪᠤᠯᠤᠳ | ᠪᠢᠷ ᠤᠨ ᠲᠤᠬᠠᠢ ᠵᠤᠭᠤᠭᠳᠠᠬᠤ ᠳᠤ ᠲᠡᠷᠡ ᠬᠤᠷᠢᠭᠠᠳ ᠵᠢᠯ ᠤᠨ ᠲᠤᠷᠰᠢ ᠭᠠᠭᠴᠠᠬᠠᠨ ᠪᠤᠯᠤᠳ ᠪᠢᠷ ᠢ ᠬᠡᠷᠡᠭᠯᠡᠵᠦ | ᠪᠠᠶᠢᠨᠠ᠂ ᠭᠠᠷ ᠲᠠᠢ ᠮᠢᠨᠢ ᠭᠠᠷ ᠪᠤᠯᠴᠢᠬᠠᠭᠰᠠᠨ ᠭᠡᠵᠦ ᠪᠢᠯᠡ᠃ ᠪᠤᠯᠤᠳ ᠪᠢᠷ ᠢ ᠬᠡᠷᠡᠭᠯᠡᠬᠦ ᠲᠤᠰᠤᠮ ᠢᠶᠠᠨ ᠭᠠᠷ ᠤᠨ | ᠠᠶᠠ ᠪᠠᠷ ᠪᠤᠯᠵᠤ ᠢᠷᠡᠳᠡᠭ ᠭᠡᠵᠦ ᠬᠡᠨ ᠨᠢᠭᠡᠨ ᠤ ᠰᠡᠴᠡᠯᠡᠭᠰᠡᠨ ᠨᠢ ᠶᠠᠭ ᠵᠥᠪ ᠠᠵᠢ᠃ ᠭᠡᠪᠡᠴᠦ ᠡᠶᠢᠮᠦ ᠪᠤᠯ ᠡᠨᠡ | ᠨᠠᠰᠤᠨ ᠳᠠᠭᠠᠨ ᠬᠡᠳᠦᠬᠡᠨ ᠪᠤᠯᠤᠳ ᠪᠢᠷ ᠡᠳ᠋ᠯᠡᠵᠦ ᠠᠮᠵᠢᠨᠠ ᠳᠠ ᠭᠡᠵᠦ ᠪᠤᠳᠤᠭᠠᠳ ᠡᠨᠡ ᠶᠠᠪᠤᠭᠠ ᠨᠠᠰᠤ ᠪᠠᠨ | ᠴᠢᠮᠠᠯᠠᠮᠠᠷ ᠪᠤᠯᠵᠤ ᠪᠢᠯᠡ᠃ | ︵︽ᠥᠪᠥᠷ ᠮᠤᠩᠭᠤᠯ ᠤᠨ ᠡᠮᠡᠭᠲᠡᠶᠢᠴᠦᠳ︾ ᠰᠡᠳᠬᠦᠯ ᠠᠴᠠ ᠰᠤᠩᠭᠤᠪᠠ︶ |