ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠰᠢᠨ᠎ᠡ ᠬᠦᠳᠡᠭᠡ
ᠦᠯᠵᠡᠶᠢᠲᠦ ᠲᠦᠰᠢᠶᠠᠲᠦ
ᠭᠠᠯᠰᠠᠩ ᠤᠨ ᠬᠢᠨ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2023/8/30
   ᠭᠡᠦᠭᠡᠳ ᠤᠨ ᠢᠶᠠᠨ ᠠᠬᠢᠨ ᠲᠠᠬᠢᠨ ᠱᠠᠯᠠᠬᠤ ᠬᠦᠴᠦ ᠪᠠᠷ ᠭᠠᠯᠰᠠᠩ ᠡᠪᠦᠭᠡᠨ ᠡᠴᠦᠰ ᠲᠡᠭᠡᠨ ᠬᠤᠳᠠ ᠤᠷᠤᠬᠤ ᠪᠠᠷ ᠪᠤᠯᠪᠠ᠃  ᠡᠪᠦᠭᠡᠨ ᠡᠮᠡᠭᠡᠨ ᠠᠴᠠ ᠭᠡᠦᠭᠡᠳ ᠵᠤᠯᠵᠠᠭ᠎ᠠ ᠤᠯᠠᠨᠳᠠᠢ᠃ ᠦᠰᠦᠭᠡᠢ ᠵᠠᠯᠭᠠᠨ ᠪᠠᠭᠤᠵᠤ ᠢᠷᠡᠭᠡᠳ ᠶᠡᠭᠡ ᠨᠢ ᠪᠠᠭ᠎ᠠ ᠪᠠᠨ ᠲᠠᠭᠠᠭᠤᠯᠵᠤ ᠬᠦᠮᠦᠨ ᠪᠤᠯᠵᠠᠭᠠᠭᠰᠠᠨ ᠤᠬᠠᠭᠠᠨ ᠲᠠᠢ᠃ ᠭᠡᠦᠭᠡᠳ ᠤᠨ ᠢᠶᠠᠨ ᠭᠤᠷᠪᠠᠨ ᠡᠷᠢᠨ ᠤ ᠬᠤᠭᠤᠯᠠ ᠶᠢ ᠨᠢ ᠵᠦᠪᠯᠡᠵᠦ ᠲᠠᠯᠤ ᠮᠦᠷᠦ ᠶᠢ ᠨᠢ ᠪᠦᠳᠦᠨ ᠪᠤᠯᠭᠠᠭᠰᠠᠨ ᠲᠡᠳᠦᠢ ᠭᠡᠪᠡᠯ ᠠᠷᠠᠢ ᠬᠢᠯᠢᠰᠳᠡᠬᠦᠯᠴᠢᠭᠡᠬᠦ᠃ ᠶᠠᠭ ᠦᠨᠡᠨ ᠢ ᠭᠡᠯᠡᠬᠦ ᠳᠤ ᠲᠡᠷᠡ ᠡᠷᠢᠨ ᠳᠤ ᠡᠳᠦᠢ ᠤᠯᠠᠨ ᠠᠮᠠᠨ ᠲᠤᠭᠠᠨ ᠤ ᠢᠳᠡᠬᠦ ᠡᠮᠦᠰᠭᠦ ᠳᠤᠨᠢ ᠵᠦᠪᠯᠡᠬᠦ ᠭᠡᠵᠤ ᠴᠤᠬᠤᠮ ᠲᠤᠮᠤ ᠠᠰᠠᠭᠤᠳᠠᠯ ᠭᠡᠵᠤ ᠮᠡᠳᠡ ᠁ ᠡᠶᠢᠮᠦ ᠲᠤᠯᠭᠠᠮ᠎ᠠ ᠲᠤᠮᠤ ᠠᠰᠠᠭᠤᠳᠠᠯ ᠢ ᠰᠢᠢᠳᠪᠦᠷᠢᠯᠡᠬᠦ ᠳᠤ ᠶᠡᠭᠡ ᠭᠡᠮᠵᠢᠶᠡᠨ ᠤ ᠴᠠᠭ ᠬᠦᠳᠡᠯᠮᠦᠷᠢ ᠭᠡᠷᠡᠭᠰᠡᠨ᠎ᠡ᠃ ᠡᠷ᠎ᠡ ᠡᠮ᠎ᠡ ᠬᠤᠶᠠᠭᠤᠯᠠ ᠭᠡᠦᠭᠡᠳ ᠤᠨ ᠢᠶᠠᠨ ᠢᠳᠡᠵᠦ ᠡᠮᠦᠰᠭᠦ ᠲᠤᠮᠤ ᠠᠰᠠᠭᠤᠳᠠᠯ ᠤᠨ ᠬᠤᠶᠢᠨ᠎ᠠ ᠠᠴᠠ ᠬᠦᠯᠦ᠋ᠰᠦ ᠪᠠᠨ ᠤᠷᠤᠰᠬᠠᠵᠤ ᠶᠠᠪᠤᠭᠰᠠᠭᠠᠷ ᠡᠳᠦᠢ ᠳᠤ ᠬᠦᠷᠴᠦ ᠢᠷᠡᠭᠡᠳ ᠰᠠᠶ᠋ᠢ ᠪᠠᠭᠠᠨ ᠠᠮᠢᠰᠬᠤᠭ᠎ᠠ ᠠᠪᠬᠤ ᠰᠢᠭ ᠪᠤᠯᠪᠠ᠃ ᠤᠳᠤ ᠠᠮᠢᠰᠬᠤᠭ᠎ᠠ ᠠᠪᠬᠤ ᠳᠤ ᠠᠮᠢᠰᠬᠤᠭ᠎ᠠ ᠠᠪᠬᠤ ᠡᠷᠢᠨ ᠪᠤᠯᠵᠠᠢ ᠭᠡᠵᠤ ᠭᠡᠦᠭᠡᠳ ᠨᠢ ᠭᠡᠯᠡᠵᠡᠭᠡᠪᠡ᠃ ᠡᠨᠡ ᠦᠭᠡᠨ ᠳᠤ ᠭᠠᠯᠰᠠᠩ ᠡᠪᠦᠭᠡᠨ ᠭᠤᠮᠤᠷᠬᠠᠬᠤ ᠰᠢᠦ ᠪᠤᠯᠵᠤ ᠤᠴᠢᠪᠠ᠃ ᠨᠢᠭᠡ ᠨᠠᠰᠤ ᠪᠠᠷ ᠢᠶᠠᠨ ᠦᠭᠡᠷ᠎ᠡ ᠶᠠᠭᠤᠮ᠎ᠠ ᠬᠢᠭᠰᠡᠨ ᠦᠭᠡᠢ᠂ ᠲᠠᠨᠤᠰ ᠢ ᠬᠦᠮᠦᠨ ᠪᠤᠯᠭᠠᠨ᠎ᠠ ᠭᠡᠵᠤ ᠦᠨᠡᠨ ᠰᠡᠳᠭᠢᠯ ᠠᠴᠠ ᠪᠠᠨ ᠮᠠᠬᠠᠷᠠᠭᠰᠠᠨ ᠪᠤᠯᠬᠤ ᠠᠴᠠ ᠭᠡᠵᠤ ᠭᠤᠮᠤᠷᠬᠠᠵᠤ ᠠᠪᠴᠠᠢ ᠁   ᠭᠠᠯᠳᠤ ᠲᠡᠷᠭᠡᠨ ᠳᠤᠨᠢ ᠠᠩᠬ᠎ᠠ ᠤᠳᠠᠭ᠎ᠠ ᠪᠠᠨ ᠰᠠᠭᠤᠬᠤ ᠪᠤᠯᠪᠠ᠃ ᠲᠡᠭᠡᠬᠦ ᠳᠤ ᠮᠠᠨᠠᠢ ᠡᠪᠦᠭᠡᠨ ᠭᠠᠯᠳᠤ ᠲᠡᠷᠭᠡ ᠨᠢ ᠭᠡᠷᠪᠡ ᠡᠯᠢᠭᠡ ᠪᠠᠷ ᠢᠶᠠᠨ ᠮᠦᠯᠬᠦᠬᠦ ᠦᠭᠡᠢ᠂ ᠬᠠᠷᠢᠨ ᠪᠤᠰᠤᠭᠠᠳ ᠬᠦᠶᠦᠪᠡᠯ ᠨᠡᠩ ᠬᠤᠷᠳᠤᠨ ᠪᠠᠶᠢᠵᠤ ᠮᠡᠳᠡᠨ᠎ᠡ ᠭᠡᠰᠡᠨ ᠲᠠᠮ ᠰᠤᠨᠤᠰᠬᠠᠯ ᠲᠠᠢ ᠶᠠᠪᠤᠭᠰᠠᠨ ᠬᠦᠮᠦᠨ ᠶᠤᠮ᠃ ᠲᠡᠷᠭᠡᠨ ᠵᠤᠭᠰᠤᠭᠠᠯ ᠳᠤ ᠪᠦᠯᠦ᠋ᠭ ᠪᠦᠯᠦ᠋ᠭ ᠢᠶᠠᠷ ᠪᠦᠭᠡᠮᠨᠡᠷᠡᠭᠰᠡᠨ ᠬᠦᠮᠦᠰ ᠲᠡᠷᠭᠡ ᠢᠷᠡᠬᠦ ᠶᠢ ᠬᠦᠯᠢᠶᠡᠵᠦ ᠵᠤᠭᠰᠤᠵᠠᠭᠠᠨ᠎ᠠ᠃ᠲᠡᠷᠭᠡ ᠤᠭᠤᠬᠢᠯᠠᠭᠰᠠᠭᠠᠷ ᠦᠷᠳᠡᠭᠡ ᠤᠷᠤᠵᠤ ᠢᠷᠡᠭᠡᠳ ᠤᠷᠳᠤ ᠠᠮᠢᠰᠬᠤᠯᠯᠠᠭᠰᠠᠭᠠᠷ ᠠᠯᠭᠤᠷ ᠵᠤᠭᠰᠤᠯ᠎ᠠ᠃ ᠮᠦᠷᠯᠡᠵᠦ ᠪᠠᠶᠢᠭᠰᠠᠨ ᠬᠦᠮᠦᠰ ᠤᠨ ᠡᠩᠨᠡᠭᠡ ᠭᠱᠠᠨ ᠵᠠᠭᠤᠷ᠎ᠠ ᠵᠠᠳᠠᠷᠠᠵᠤ ᠬᠦᠮᠦᠰ ᠲᠡᠷᠭᠡᠨ ᠡᠬᠦᠳᠡ ᠲᠡᠮᠡᠴᠡᠨ ᠬᠦᠶᠦᠯᠳᠦᠯ᠎ᠡ᠃ ᠡᠬᠦᠷᠭᠡ ᠲᠡᠬᠦᠷᠭᠡ ᠪᠤᠭᠴᠤ ᠪᠤᠭᠤᠳᠠᠯ ᠢᠶᠠᠨ ᠲᠡᠪᠡᠷᠢᠬᠦ ᠨᠢ ᠲᠡᠪᠡᠷᠢᠵᠦ᠂ ᠡᠬᠦᠷᠬᠦ ᠨᠢ ᠡᠬᠦᠷᠴᠦ᠂ ᠨᠢᠯᠬ᠎ᠠ ᠲᠠᠢ ᠨᠢ ᠨᠢᠯᠬ᠎ᠠ ᠪᠠᠨ ᠲᠡᠳᠡᠭᠡᠨᠡᠳᠡᠯ᠎ᠡ ᠴᠢᠷᠴᠦ ᠬᠦᠶᠦᠯᠳᠦᠪᠡ᠃ ᠬᠦᠮᠦᠰ ᠠᠵᠢᠯᠳᠠᠳ ᠤᠨ ᠵᠢᠯᠤᠭᠤᠳᠤᠯᠭ᠎ᠠ ᠶᠢ ᠭᠡᠷᠡᠭᠰᠡᠬᠦ ᠪᠠᠶᠢᠳᠠᠯ ᠤᠭᠳᠤ ᠦᠭᠡᠢ᠂ ᠵᠦᠪᠭᠡᠨ ᠲᠡᠷᠭᠡᠨ ᠳᠤ ᠤᠷᠢᠳ ᠢᠶᠠᠷ ᠭᠠᠷᠬᠤ ᠪᠠᠷ ᠦᠷᠢᠰᠦᠯᠳᠦᠵᠦ᠂ ᠴᠢᠷᠠᠢ ᠪᠠᠨ ᠤᠯᠠᠶᠢᠯᠭᠠᠵᠤ ᠬᠦᠵᠦᠬᠦᠦ ᠪᠠᠨ ᠭᠤᠷᠳᠠᠶᠢᠯᠭᠠᠵᠠᠭᠠᠪᠠ᠃ ᠴᠢᠷᠦᠭᠳᠡᠭᠰᠡᠨ ᠬᠤᠷᠮᠤᠢ ᠬᠤᠰᠢ ᠪᠠᠨ ᠤᠴᠠᠭᠠᠷᠳᠠᠶᠢᠬᠠᠨ ᠲᠠᠳᠠᠯᠴᠠᠵᠤ᠂ ᠬᠦᠯ ᠢᠶᠠᠨ ᠬᠢᠰᠭᠢᠯᠴᠡᠵᠦ᠂ ᠮᠠᠭᠤ ᠰᠠᠶᠢᠨ ᠬᠠᠷᠢᠶᠠᠯ ᠤᠷᠤᠰᠬᠠᠵᠠᠭᠠᠨ᠎ᠠ᠃   ᠡᠪᠦᠭᠡᠨ ᠢ ᠲᠡᠷᠭᠡᠨ ᠳᠤ ᠠᠷᠠᠢ ᠭᠠᠷᠳᠠᠯ᠎ᠠ ᠲᠡᠷᠭᠡ ᠬᠦᠳᠡᠯᠴᠢᠭᠡᠪᠡ᠃ ᠬᠤᠵᠢᠭᠳᠠᠯ᠎ᠠ ᠭᠡᠵᠤ ᠠᠶᠤᠵᠤ ᠪᠠᠶᠢᠭᠰᠠᠨ ᠴᠢᠨᠢ ᠠᠰᠢᠬᠦᠢ ᠠᠮᠵᠢᠭᠤᠯᠤᠭᠰᠠᠨ ᠪᠠᠶᠢᠨ᠎ᠠ᠃ ᠠᠷᠭᠠᠯᠠᠵᠤ ᠰᠠᠭᠤᠳᠠᠯ ᠢᠶᠠᠨ ᠤᠯᠵᠤ ᠠᠪᠤᠯ᠎ᠠ᠃ ᠮᠢᠬ᠎ᠠ ᠲᠠᠷᠢᠶ᠎ᠠ ᠪᠠᠨ ᠲᠡᠯᠭᠡᠵᠦ ᠠᠷᠢᠬᠢ ᠭᠤᠳᠤᠷᠴᠤ ᠪᠦᠬᠦᠢ ᠭᠡᠳᠦᠨ ᠬᠦᠮᠦᠨ ᠲᠠᠢ ᠵᠡᠷᠭᠡᠴᠡᠨ ᠰᠠᠭᠤᠪᠠ᠃ ᠬᠤᠷᠤᠭᠤ ᠵᠢᠮᠡᠯᠴᠡᠵᠦ ᠦᠨᠳᠦᠷ ᠲᠠᠭᠤ ᠪᠠᠷ ᠬᠠᠭᠠᠯᠠᠨ ᠢᠨᠢᠶᠡᠬᠦ ᠳᠤ ᠠᠮᠠᠨ ᠠᠴᠠ ᠨᠢ ᠢᠳᠡᠰᠢᠨ ᠤ ᠦᠷᠦᠪᠳᠡᠰᠦ ᠬᠠᠶᠠ ᠦᠯᠢᠶᠡᠭᠳᠡᠨ ᠪᠤᠳᠠᠷᠠᠵᠤ ᠪᠠᠶᠢᠯ᠎ᠠ᠃ ᠵᠢᠰᠢᠬᠦᠦ ᠰᠠᠭᠤᠳᠠᠯ ᠳᠤ ᠲᠠᠷᠭᠤᠨ ᠰᠢᠷ᠎ᠠ ᠪᠦᠰᠡᠬᠦᠢ ᠲᠤᠮᠤ ᠬᠦᠬᠦ ᠪᠠᠨ ᠬᠠᠭᠠᠰ ᠢᠯᠡᠬᠦᠦ ᠭᠠᠷᠭᠠᠵᠤ ᠭᠡᠦᠭᠡᠳ ᠬᠦᠬᠦᠬᠦᠯᠵᠦ ᠪᠠᠶᠢᠪᠠ᠃ ᠪᠠᠰᠠ ᠬᠠᠶᠠ ᠲᠤᠭᠵᠢᠷᠠᠵᠤ ᠠᠪᠤᠨ᠎ᠠ᠃ ᠤᠳᠠᠯ ᠦᠭᠡᠢ ᠠᠵᠢᠯᠳᠠᠨ ᠲᠡᠷᠭᠡᠨ ᠭᠤᠳᠤᠮ ᠢ ᠱᠦᠬᠦᠷᠳᠡᠵᠦ ᠨᠠᠭᠠᠰᠢᠯᠠᠬᠤ ᠬᠠᠷᠠᠭᠳᠠᠨ᠎ᠠ᠃ ᠠᠭᠤᠯᠠ ᠤᠪᠤᠭ᠎ᠠ ᠴᠢᠨᠡᠭᠡ ᠬᠤᠭ ᠨᠤᠪᠰᠢ ᠶᠢ ᠨᠤᠮᠤᠨ ᠰᠤᠬᠤᠷ ᠰᠢᠷᠤᠢ ᠶᠢᠨ ᠤᠪᠤᠭ᠎ᠠ ᠭᠠᠷᠭᠠᠬᠤ ᠠᠳᠠᠯᠢ ᠲᠦᠯᠬᠢᠭᠰᠡᠭᠡᠷ ᠤᠶᠢᠷᠠᠳᠤᠨ᠎ᠠ᠃ ᠢᠳᠡᠭᠡᠨ ᠤ ᠬᠠᠯᠢᠰᠤ᠂ ᠢᠳᠡᠰᠢᠨ ᠤ ᠤᠭᠤᠳᠠ᠂ ᠤᠮᠳᠠᠭᠠᠨ ᠤ ᠰᠦᠯᠢᠶᠤᠤ ᠯᠤᠩᠬᠤ᠂ ᠬᠠᠭᠠᠰ ᠢᠳᠡᠭᠡᠳ ᠤᠷᠬᠢᠭᠰᠠᠨ ᠰᠢᠳᠦᠨ ᠤᠷᠤᠮ ᠪᠦᠬᠦᠢ ᠠᠯᠮᠤᠷᠠᠳ᠂ ᠲᠠᠮᠠᠬᠢᠨ ᠶᠤᠵᠤᠭᠤᠷ᠂ ᠵᠦᠯᠬᠦᠬᠦᠷ ᠴᠠᠭᠠᠰᠤ᠂ ᠤᠶᠢᠮᠤᠰᠤ ᠲᠡᠷᠢᠬᠦᠳᠡᠨ ᠬᠦᠭᠯᠡᠷᠡᠵᠦ ᠬᠠᠷᠠᠭᠳᠠᠨ᠎ᠠ᠃ ᠰᠠᠶ᠋ᠢᠶ᠋ᠢᠨ ᠭᠡᠳᠦᠬᠦᠯᠡ ᠮᠦᠯᠵᠢᠭᠰᠡᠨ ᠭᠠᠭᠠᠢ ᠶᠢᠨ ᠰᠢᠬᠢᠷ᠎ᠡ ᠶᠢᠨ ᠶᠠᠰᠤ᠂ ᠦᠨᠳᠡᠭᠡᠨ ᠬᠠᠯᠢᠰᠤ᠂ ᠰᠢᠯ ᠯᠤᠩᠬᠤ ᠪᠠᠨ ᠬᠤᠭ ᠨᠤᠪᠰᠢ ᠶᠢᠨ ᠤᠪᠤᠭᠠᠨ ᠳᠤ ᠰᠦᠷᠦᠭ ᠨᠡᠶᠢᠯᠡᠬᠦᠯᠵᠦ ᠦᠭᠪᠡ᠃   ᠲᠡᠭᠡᠬᠦᠯᠡᠷ ᠡᠪᠦᠭᠡᠨ ᠤ ᠬᠠᠮᠠᠷ ᠲᠤ ᠰᠢᠪᠡᠷᠢ ᠶᠢᠨ ᠦᠨᠦᠷ ᠰᠡᠩᠬᠢᠨᠡᠪᠠ᠃ ᠠᠷᠢᠬᠢ ᠤᠤᠭᠤᠵᠤ ᠪᠠᠶᠢᠭ᠎ᠠ ᠮᠤᠯᠳᠤᠭ ᠲᠤᠯᠤᠭᠠᠶᠢᠳᠤ ᠱᠠᠬᠠᠢ ᠪᠠᠨ ᠲᠠᠶᠢᠯᠤᠭᠠᠳ ᠵᠠᠪᠢᠯᠠᠵᠤ ᠰᠠᠭᠤᠵᠤ ᠪᠠᠶᠢᠭᠰᠠᠨ ᠢ ᠡᠪᠦᠭᠡᠨ ᠬᠠᠶᠢᠵᠤ ᠬᠠᠷᠠᠪᠠ᠃ ᠲᠡᠷᠭᠡᠨ ᠤ ᠴᠠᠭᠠᠳᠤ ᠲᠠᠯ᠎ᠠ ᠠᠴᠠ ᠪᠠᠷᠠᠭᠠᠨ ᠤ ᠲᠡᠷᠭᠡ ᠲᠦᠯᠬᠢᠭᠰᠡᠨ ᠠᠵᠢᠯᠳᠠᠨ ᠠᠭᠠᠵᠢᠮ ᠢᠶᠠᠷ ᠨᠠᠭᠠᠰᠢᠯᠠᠨ᠎ᠠ᠃ ᠠᠵᠢᠯᠳᠠᠨ ᠤ ᠠᠮᠠ ᠨᠢ ᠠᠩᠭᠠᠯᠵᠠᠬᠤ ᠠᠴᠠ ᠪᠢᠰᠢ ᠦᠭᠡ ᠨᠢ ᠢᠯᠭᠠᠪᠤᠷᠢ ᠦᠭᠡᠢ᠃ ᠠᠶᠠᠨᠴᠢᠳ ᠤᠨ ᠦᠢᠮᠡᠭᠡᠨ ᠨᠠᠷᠬᠢᠶᠠᠨ ᠳᠤ ᠨᠢᠭᠡᠮᠦᠰᠦᠨ ᠲᠠᠷᠤᠭᠳᠠᠵᠤ ᠪᠠᠶᠢᠯ᠎ᠠ᠃ ᠪᠠᠷᠠᠭᠠᠨ ᠤ ᠬᠢᠨᠢ ᠦᠨ᠎ᠡ ᠲᠠᠢ ᠭᠡᠳᠡᠭ ᠨᠢ ᠭᠡᠷᠡᠭ᠃ ᠲᠡᠭᠷᠢ ᠶᠢᠨ ᠬᠠᠩᠰᠢ ᠭᠡᠪᠡᠯ ᠨᠢᠭᠡ ᠯᠡ ᠦᠭᠡ᠃ ᠨᠢᠭᠡ ᠯᠤᠩᠬᠤ ᠤᠰᠤ ᠵᠠᠬ᠎ᠠ ᠳᠤ ᠬᠤᠶᠠᠷ ᠲᠦᠬᠦᠷᠢᠭ ᠪᠤᠯ ᠠᠳᠡ ᠲᠦᠷᠪᠡᠨ ᠲᠦᠬᠦᠷᠢᠭ᠃ ᠭᠡᠯᠡᠯᠴᠡᠭᠡ ᠦᠭᠡᠢ ᠲᠦᠷᠪᠡᠨ ᠲᠦᠬᠦᠷᠢᠭ᠂ ᠠᠪᠤᠪᠠᠯ ᠠᠪ᠂ ᠠᠪᠬᠤ ᠦᠭᠡᠢ ᠪᠤᠯ ᠪᠠᠶᠢᠭ ᠭᠡᠰᠡᠨ ᠰᠡᠭᠡᠷ ᠲᠠᠢ᠃ ᠵᠠᠷᠢᠮ ᠨᠢ ᠪᠤᠰᠤᠳ ᠢ ᠲᠠᠭᠤᠷᠢᠶᠠᠵᠤ ᠠᠪᠤᠭᠠᠳ ᠢᠳᠡᠵᠦ ᠤᠤᠭᠤᠳᠠᠭ᠂ ᠪᠢ ᠪᠠᠰᠠ ᠠᠳᠠᠯᠢᠬᠠᠨ ᠠᠪᠴᠦ ᠲᠠᠶᠢᠯᠦ᠋ᠨ᠎ᠡ ᠭᠡᠰᠡᠨ ᠰᠢᠭ᠃ ᠬᠤᠭᠤᠷᠤᠨᠳᠤ ᠪᠠᠨ ᠭᠡᠳᠦ᠋ᠪᠡᠷ ᠲᠠᠨᠢᠯᠴᠠᠬᠤ ᠦᠭᠡᠢ ᠪᠤᠯᠪᠠᠴᠤ᠃ ᠨᠢᠭᠤᠷ ᠭᠡᠳᠡᠭ ᠶᠠᠭᠤᠮ᠎ᠠ ᠡᠶᠢᠮᠦ ᠰᠢᠦ ᠪᠠᠶᠢᠳᠠᠯ ᠲᠠᠢ ᠶᠠᠭᠤᠮ᠎ᠠ᠃ ᠢᠪ ᠢᠯᠡᠭᠡᠨ ᠬᠦᠮᠦᠨ ᠳᠤ ᠲᠠᠷᠤᠭᠳᠠᠬᠤ ᠪᠠᠨ ᠮᠡᠳᠡᠵᠦ ᠪᠠᠶᠢᠪᠠᠴᠤ ᠰᠢᠳᠦ ᠪᠠᠨ ᠵᠠᠭᠤᠭᠠᠳ ᠮᠡᠳᠭᠡᠨ᠎ᠡ᠃ ᠨᠠᠭᠠᠳᠤ ᠵᠠᠬ᠎ᠠ ᠳᠠᠭᠠᠨ ᠨᠢᠭᠤᠷ ᠢᠶᠠᠨ ᠭᠡᠭᠡᠬᠦ ᠦᠭᠡᠢ᠂ ᠨᠢᠭᠤᠷ ᠢᠶᠠᠨ ᠠᠪᠴᠤ ᠭᠠᠷᠤᠨ᠎ᠠ ᠭᠡᠳ ᠮᠡᠳᠭᠡᠨ᠎ᠡ᠃ ᠡᠨᠡ ᠪᠤᠯ ᠬᠦᠮᠦᠨ ᠤ ᠨᠡᠷᠡᠯᠭᠡᠭ ᠵᠠᠩ᠃ ᠨᠡᠷ᠎ᠡ ᠨᠢᠭᠤᠷ ᠲᠤ ᠲᠤᠷᠠᠳᠠᠢ ᠭᠡᠵᠦ ᠭᠠᠯᠰᠠᠩ ᠰᠠᠨᠠᠨ᠎ᠠ᠃ ᠬᠠᠷᠢᠨ ᠵᠠᠷᠢᠮ ᠨᠢ ᠠᠪᠴᠤ ᠲᠡᠶᠢᠯᠬᠦ ᠪᠤᠯᠪᠠᠴᠤ ᠪᠡᠶ᠎ᠡ ᠪᠠᠨ ᠪᠠᠷᠢᠭᠠᠳ ᠬᠦᠳᠡᠯᠬᠦ ᠦᠭᠡᠢ᠂ ᠪᠠᠰᠠ ᠵᠠᠷᠢᠮ ᠨᠢ ᠦᠨᠡᠨ ᠬᠦ ᠦᠯᠦ᠋ᠰᠴᠦ ᠤᠮᠳᠠᠭᠠᠰᠴᠤ ᠪᠠᠶᠢᠪᠠᠴᠤ ᠮᠦᠩᠬᠦ ᠪᠠᠨ ᠬᠠᠶᠢᠷᠠᠯᠠᠭᠠᠳ ᠠᠪᠬᠤ ᠦᠭᠡᠢ᠂ ᠬᠠᠶᠠ ᠵᠠᠷᠢᠮ ᠨᠢ ᠪᠤᠰᠤᠳ ᠲᠤ ᠴᠢᠳᠠᠯ ᠲᠠᠢ ᠪᠠᠨ ᠦᠵᠡᠬᠦᠯᠬᠦ ᠶᠢᠨ ᠲᠦᠯᠦ᠋ᠭᠡ ᠵᠤᠷᠢᠭᠤᠳᠠ ᠦᠨᠡᠳᠡᠢ ᠶᠢ ᠨᠢ ᠰᠠᠶᠢᠨ ᠢ ᠨᠢ ᠲᠡᠮᠳᠡᠷᠢᠨ᠎ᠡ ᠃ ᠲᠠᠨᠢᠬᠤ ᠦᠭᠡᠢ ᠬᠦᠮᠦᠨ ᠤ ᠡᠮᠦᠨ᠎ᠡ ᠪᠤᠯᠪᠠᠴᠤ ᠦᠩᠭᠡ ᠲᠠᠢ ᠮᠢᠨᠳᠠᠭ ᠲᠠᠢ ᠲᠦᠷᠢᠯᠡᠨ᠎ᠡ᠃   ᠭᠠᠯᠰᠠᠩ ᠡᠪᠦᠭᠡᠨ ᠡᠨᠡ ᠤᠳᠠᠭ᠎ᠠ ᠬᠤᠯᠠ ᠠᠶᠠᠯᠠᠭ᠎ᠠ ᠦᠭᠡᠢ᠃ ᠭᠡᠳᠦ᠋ᠪᠡᠷ ᠡᠨᠡ ᠤᠳᠠᠭ᠎ᠠ ᠲᠦᠷᠦᠬᠦᠦ ᠤᠳᠠᠭ᠎ᠠ ᠪᠤᠯᠤᠯ᠎ᠠ ᠭᠡᠳ᠃ ᠭᠠᠯᠰᠠᠩ ᠮᠤᠵᠢᠭᠤᠳᠠᠯᠠᠭᠠᠳ ᠵᠦᠪᠭᠡᠨ ᠭᠠᠵᠠᠷ ᠤᠨ ᠲᠡᠰ ᠤᠨ ᠬᠤᠳᠠ ᠪᠠᠷ ᠲᠤᠭᠤᠷᠢᠪᠠᠯ ᠪᠤᠯᠴᠢᠬᠠᠨ᠎ᠠ ᠭᠡᠪᠡ᠃ ᠭᠠᠯᠰᠠᠩ ᠡᠪᠦᠭᠡᠨ ᠤ ᠵᠦᠷᠢᠬᠦᠦ ᠡᠰᠢᠯᠡᠭᠰᠡᠨ ᠰᠦᠭᠡ ᠭᠡᠰᠡᠨ ᠢ ᠶᠠᠪᠤᠯᠴᠠᠳᠠᠭ ᠬᠦᠮᠦᠨ ᠨᠢ ᠪᠦᠷ ᠮᠡᠳᠡᠨ᠎ᠡ᠃ ᠨᠢᠭᠡ ᠯᠡ ᠦᠭᠡ ᠵᠦᠷᠢᠪᠡᠯ ᠮᠡᠳᠡᠭᠳᠡᠴᠢᠭᠡᠬᠦ ᠭᠡᠴᠡᠬᠦᠦ ᠵᠦᠷᠢᠬᠦᠦ ᠡᠪᠦᠭᠡᠨ ᠪᠤᠯ ᠭᠠᠯᠰᠠᠩ᠃ ᠲᠠᠪᠢ ᠭᠠᠷᠤᠭᠰᠠᠨ ᠴᠦ ᠵᠠᠯᠭᠠᠭᠠᠳ ᠲᠦᠷᠦᠵᠦ ᠪᠠᠶᠢᠳᠠᠯ᠎ᠠ ᠦᠷᠡᠵᠢᠯ ᠢ ᠲᠠᠰᠤᠯᠬᠤ ᠮᠡᠰᠡ ᠵᠠᠰᠠᠯ ᠵᠠᠪᠠᠯ ᠬᠢᠬᠦ ᠪᠤᠯᠤᠭᠠᠳ ᠪᠦᠰᠡᠬᠦᠢ ᠨᠢ ᠰᠠᠶ᠋ᠢ ᠲᠦᠷᠦᠬᠦ ᠪᠠᠨ ᠪᠤᠯᠢᠪᠠ᠃ ᠡᠬᠦᠷ ᠲᠦᠬᠦᠷᠡᠩ ᠦᠨᠳᠡᠭᠡᠨ ᠲᠡᠭᠡᠷ᠎ᠡ ᠪᠠᠨ ᠦᠪᠦᠯᠵᠡᠬᠦ ᠡᠮᠡᠭᠴᠢᠨ ᠲᠠᠬᠢᠶ᠎ᠠ ᠰᠢᠭ ᠠᠮᠢᠳᠤᠷᠠᠯ ᠳᠤᠨᠢ ᠦᠨᠳᠡᠭᠡᠨ ᠠᠴᠠ ᠤᠨᠳᠤᠤ ᠦᠪ ᠬᠦᠷᠦᠩᠭᠡ ᠪᠠᠶᠢᠬᠤ ᠦᠭᠡᠢ ᠶᠢ ᠰᠠᠶ᠋ᠢ ᠤᠪᠠᠶᠢᠯᠠᠭᠰᠠᠨ ᠰᠢᠭ ᠪᠤᠯᠵᠤ ᠰᠤᠴᠢᠰᠭᠢᠵᠡᠢ᠃ ᠡᠷ᠎ᠡ ᠨᠢ ᠡᠷᠡᠭᠴᠢᠨ ᠲᠠᠬᠢᠶ᠎ᠠ ᠰᠢᠭ ᠬᠦᠷᠢᠶ᠎ᠡ ᠬᠠᠰᠢᠶ᠎ᠠ ᠪᠠᠷ ᠲᠡᠨᠦᠬᠦ ᠠᠴᠠ ᠦᠭᠡᠷ᠎ᠡ᠃ ᠲᠡᠳᠡ ᠭᠡᠳᠦ᠋ᠪᠡᠷ ᠡᠷᠳᠡᠮ ᠮᠡᠳᠡᠯᠭᠡ ᠲᠦᠷᠦᠬᠦᠦ ᠪᠠᠶᠠᠨ᠂ ᠦᠷ᠎ᠡ ᠭᠡᠦᠭᠡᠳ ᠬᠤᠶᠠᠳᠤᠭᠠᠷ ᠪᠠᠶᠠᠨ᠂ ᠡᠳ᠋ ᠮᠦᠩᠬᠦ ᠠᠳᠠᠭ ᠪᠠᠶᠠᠨ ᠭᠡᠵᠤ ᠰᠤᠨᠤᠰᠴᠤ ᠪᠠᠶᠢᠭᠰᠠᠨ ᠴᠦ ᠪᠠᠭᠠᠨ ᠭᠡᠳᠦᠷᠡᠬᠦᠯᠦ᠋ᠭᠰᠡᠨ ᠢᠶᠠᠨ ᠤᠶᠢᠯᠠᠭᠠᠵᠠᠢ᠃ ᠲᠡᠭᠡᠭᠡᠳ ᠶᠠᠭᠠᠬᠢᠶ᠎ᠠ ᠨᠢᠭᠡ ᠭᠡᠳᠦ ᠶᠢ ᠨᠢ ᠪᠢᠴᠢᠭ ᠲᠠᠢ ᠬᠦᠮᠦᠨ ᠪᠤᠯᠭᠠᠨ᠎ᠠ ᠭᠡᠵᠤ ᠵᠢᠳᠬᠦᠵᠦ ᠦᠵᠡᠭᠡᠳ ᠠᠮᠵᠢᠯᠳᠠ ᠤᠯᠵᠠᠢ᠃ ᠶᠠᠳᠠᠭᠤ ᠭᠡᠷ ᠤᠨ ᠭᠡᠦᠭᠡᠳ ᠡᠷᠳᠡ ᠲᠤᠮᠤᠭᠠᠵᠢᠨ᠎ᠠ ᠭᠡᠳᠡᠭ ᠢᠶᠠᠷ ᠪᠤᠯᠵᠤ ᠭᠡᠳᠦᠨ ᠭᠡᠦᠭᠡᠳ ᠨᠢ ᠪᠢᠴᠢᠭ ᠨᠤᠮ ᠰᠠᠶᠢᠨ ᠰᠤᠷᠤᠭᠠᠳ ᠠᠯᠤᠰ ᠬᠤᠳᠠ ᠳᠤ ᠠᠯᠪᠠᠳᠠᠨ ᠪᠤᠯᠵᠠᠢ᠃   ᠬᠤᠷᠢᠶᠠᠯᠳᠠ ᠶᠢ ᠨᠡᠮᠡᠭᠳᠡᠬᠦᠯᠬᠦ ᠶᠢᠨ ᠲᠦᠯᠦ᠋ᠭᠡ ᠲᠡᠷᠡ ᠵᠢᠯ ᠲᠠᠯ᠎ᠠ ᠭᠠᠵᠠᠷ ᠢ ᠨᠡᠭᠡᠭᠡᠬᠦ ᠪᠠᠷ ᠵᠦᠪᠯᠡᠪᠡ᠃ ᠤᠴᠢᠷ ᠨᠢ ᠵᠢᠯ ᠵᠢᠯ ᠤᠯᠠᠶᠢᠮ᠎ᠠ ᠭᠠᠩ ᠪᠤᠯᠵᠤ ᠪᠠᠶᠢᠪᠠ᠃ ᠡᠨᠡ ᠵᠢᠯ ᠵᠠᠯᠭᠠᠭᠠᠳ ᠵᠤ ᠭᠠᠵᠠᠷ ᠲᠠᠷᠢᠪᠠᠯ ᠯᠠᠪᠳᠠᠢ ᠡᠯᠪᠡᠭ ᠬᠤᠷᠢᠶᠠᠨ᠎ᠠ ᠭᠡᠵᠤ ᠭᠠᠯᠰᠠᠩ ᠵᠦᠷᠢᠬᠦᠳᠯᠡᠪᠡ᠃ ᠦᠶ᠎ᠡ ᠬᠤᠷᠠᠭᠴᠤᠤᠯ ᠨᠢ ᠭᠠᠯᠰᠠᠩ ᠤᠨ ᠵᠦᠷᠢᠬᠦᠦ ᠨᠢ ᠪᠠᠰᠠ ᠬᠦᠳᠡᠯᠵᠡᠢ ᠭᠡᠵᠡᠭᠡᠪᠡ᠃ ᠭᠡᠳᠡᠯ᠎ᠡ ᠲᠡᠷᠡ ᠵᠢᠯ ᠬᠤᠷ᠎ᠠ ᠪᠤᠷᠤᠭᠠᠨ ᠶᠡᠭᠡᠳᠡᠢ ᠵᠢᠯ ᠪᠤᠯᠵᠤ ᠲᠠᠯ᠎ᠠ ᠶᠢᠨ ᠲᠠᠷᠢᠶ᠎ᠠ ᠤᠰᠤᠳᠤᠭᠠᠳ ᠮᠠᠩᠬᠠᠨ ᠲᠠᠷᠢᠶ᠎ᠠ ᠲᠡᠯᠪᠡ ᠲᠦᠷᠦᠪᠡ᠃ ᠪᠤᠰᠤᠳ ᠪᠠᠷᠢᠭᠠᠳᠠ ᠶᠢᠨ ᠬᠢᠨ ᠴᠦ ᠮᠠᠩᠬᠠᠨ ᠲᠠᠷᠢᠶ᠎ᠠ ᠪᠠᠨ ᠲᠠᠷᠢᠭᠰᠠᠨ ᠨᠢ ᠦᠨᠡᠭᠡᠷ ᠴᠦ ᠲᠠᠭᠠᠭ᠎ᠠ ᠶᠠᠳᠠᠳᠠᠯ᠎ᠠ ᠡᠯᠪᠡᠭ ᠬᠤᠷᠢᠶᠠᠯ᠎ᠠ᠃ ᠲᠡᠭᠡᠭᠡᠳ ᠪᠠᠷᠢᠭᠠᠳᠠ ᠶᠢᠨ ᠦᠭᠡᠷ ᠲᠡᠷᠭᠡ ᠮᠤᠷᠢᠨ ᠲᠡᠷᠭᠡ ᠪᠠᠷ ᠴᠠᠭᠠᠨ ᠬᠢᠷᠠᠭᠤ ᠤᠨᠠᠳᠠᠯ᠎ᠠ ᠲᠡᠷᠢᠶ᠎ᠡ ᠪᠠᠨ ᠲᠡᠭᠡᠭᠡᠵᠦ ᠤᠷᠤᠭᠤᠯᠪᠠ᠃ ᠬᠦᠯᠦ᠋ᠰᠢᠨ ᠦᠭᠡᠷ ᠮᠤᠷᠢᠳ ᠨᠢ ᠬᠦᠵᠦᠬᠦᠦ ᠪᠠᠨ ᠭᠤᠷᠳᠦ᠋ᠢᠳᠠᠯ᠎ᠠ ᠲᠡᠷᠭᠡ ᠴᠢᠩᠭᠠᠭᠠᠪᠠ᠃ ᠠᠭᠤᠯᠠ ᠭᠠᠷᠳᠠᠯ᠎ᠠ ᠲᠠᠷᠢᠶ᠎ᠠ ᠲᠡᠭᠡᠭᠡᠭᠰᠡᠨ ᠦᠭᠡᠷ ᠲᠡᠷᠭᠡ ᠮᠤᠷᠢᠨ ᠲᠡᠷᠭᠡ ᠶᠠᠩᠰᠢᠯᠳᠠᠩ ᠤᠨ ᠲᠡᠪᠠᠭᠠᠨ ᠲᠡᠭᠡᠷ᠎ᠡ ᠭᠡᠳᠦ᠋ᠴᠢᠨᠡᠭᠡᠨ ᠲᠤᠷᠴᠤ ᠪᠠᠶᠢᠪᠠ︖ ᠠᠷᠭ᠎ᠠ ᠦᠭᠡᠢ ᠪᠤᠯ ᠶᠠᠩᠰᠢᠯᠳᠠᠩ ᠤᠨ ᠲᠠᠪᠠᠭᠠᠨ ᠲᠡᠭᠡᠷ᠎ᠡ ᠬᠤᠨᠤᠭᠯᠠᠵᠤ ᠮᠠᠷᠭᠠᠰᠢ ᠨᠢ ᠲᠠᠬᠢᠭᠠᠳ ᠠᠷᠭ᠎ᠠ ᠵᠦᠪᠳᠡᠨ᠎ᠡ᠃ ᠲᠦᠷᠪᠡ ᠬᠦᠯᠦ᠋ᠭᠰᠡᠨ ᠦᠭᠡᠷ ᠮᠤᠷᠢᠨ ᠲᠡᠷᠭᠡ ᠬᠦᠨᠳᠦ ᠠᠴᠢᠶ᠎ᠠ ᠲᠠᠭᠠᠭᠠᠳᠠᠭ᠃ ᠬᠦᠯ ᠲᠡᠩᠨᠡᠭᠰᠡᠨ ᠮᠤᠷᠢᠨ ᠲᠡᠷᠭᠡ ᠭᠡᠵᠤ ᠵᠢᠫᠦ᠋ ᠲᠡᠷᠭᠡ ᠦᠭᠡᠷ᠎ᠡ ᠦᠭᠡᠢ ᠵᠢᠷᠢᠯᠵᠡᠬᠦᠯᠦ᠋ᠭᠡᠳ᠃ ᠢᠯᠠᠩᠭᠤᠶ᠎ᠠ ᠲᠠᠯᠠᠪᠤᠷ ᠭᠠᠵᠠᠷ ᠤᠨ ᠰᠢᠷᠤᠢ ᠶᠢᠨ ᠵᠠᠮ ᠢᠶᠠᠷ ᠵᠢᠷᠢᠯᠵᠡᠬᠦᠯᠬᠦ ᠶᠤᠮ ᠪᠤᠯ ᠁ ᠲᠠᠷᠪᠤᠰ ᠢᠳᠡᠭᠡᠳ ᠲᠡᠭᠡᠷ᠎ᠡ ᠠᠴᠠ ᠨᠢ ᠨᠢᠭᠡ ᠭᠠᠩᠰᠠ ᠲᠠᠮᠠᠬᠢ ᠲᠠᠳᠠᠬᠤ ᠵᠢᠷᠭᠠᠯ ᠢ ᠭᠤᠸᠠᠩᠳᠦ᠋ᠩ ᠭᠠᠵᠠᠷ ᠤᠴᠢᠭᠠᠳ ᠨᠤᠶᠠᠨ ᠰᠠᠭᠤᠬᠤ ᠪᠠᠷ ᠰᠤᠯᠢᠬᠤ ᠦᠭᠡᠢ ᠭᠡᠵᠤ ᠮᠠᠨᠠᠶᠢᠬᠢᠨ ᠲᠦᠷᠦᠭᠳᠡᠯ ᠢᠶᠠᠨ ᠭᠡᠯᠡᠳᠡᠭ ᠁ ᠲᠡᠷᠡ ᠨᠢ ᠪᠠᠷᠤᠭ ᠵᠤᠯ ᠵᠢᠷᠭᠠᠯ ᠢ ᠭᠡᠯᠡᠭᠰᠡᠨ ᠪᠠᠶᠢᠬ᠎ᠠ ᠡ᠃    ᠵᠤᠯ ᠵᠢᠷᠭᠠᠯ ᠭᠡᠬᠦ ᠠᠴᠠ ᠭᠠᠯᠰᠠᠩ ᠡᠪᠦᠭᠡᠨ ᠪᠤᠯ ᠤᠳᠤ ᠪᠠᠶ᠎ᠡ ᠪᠠᠨ ᠵᠢᠷᠭᠠᠯ ᠲᠠᠢ ᠪᠠᠶᠢᠨ᠎ᠠ ᠭᠡᠵᠤ ᠪᠤᠳᠤᠨ᠎ᠠ᠃ ᠵᠢᠷᠭᠠᠯ ᠭᠡᠳᠡᠭ ᠤᠨ ᠲᠤᠰ ᠪᠡᠶ᠎ᠡ ᠨᠢ ᠰᠡᠷᠡᠯ ᠲᠦᠷᠦᠭᠳᠡᠯ ᠶᠤᠮ ᠬᠤᠶᠢᠨ᠎ᠠ᠃ ᠭᠠᠯᠰᠠᠩ ᠡᠪᠦᠭᠡᠨ ᠤ ᠮᠡᠳᠡᠵᠦ ᠪᠠᠶᠢᠬᠤ ᠪᠠᠷ ᠤᠳᠤ ᠭᠡᠯᠳᠦᠰᠭᠢᠪᠡᠯ ᠭᠡᠭᠡᠷ᠎ᠡ ᠬᠤᠨᠤᠳᠠᠭ᠂ ᠭᠡᠳᠡᠰᠦ ᠦᠯᠦ᠋ᠰᠳᠡᠭ ᠲᠡᠶᠢᠮᠦ ᠴᠠᠭ ᠦᠶ᠎ᠡ ᠪᠢᠰᠢ ᠪᠤᠯᠤᠭᠰᠠᠨ᠃ ᠡᠨᠡ ᠴᠢᠨᠢ ᠵᠢᠷᠭᠠᠯ ᠭᠡᠵᠤ ᠪᠤᠳᠤᠨ᠎ᠠ᠃ ᠬᠦᠮᠦᠨ ᠬᠦᠮᠦᠨ ᠤ ᠵᠢᠷᠭᠠᠯ ᠤᠨᠳᠤᠤ ᠭᠡᠵᠤ ᠪᠤᠳᠤᠨ᠎ᠠ᠃ ᠭᠡᠦᠭᠡᠳ ᠤᠨ ᠬᠢᠨᠢ ᠵᠢᠷᠭᠠᠯ ᠲᠡᠬᠦᠨ ᠤ ᠬᠢ ᠠᠴᠠ ᠤᠨᠳᠤᠤ ᠪᠦᠭᠡᠳ ᠤᠨᠳᠤᠤ ᠪᠠᠶᠢᠬᠤ ᠳᠠᠭᠠᠨ ᠰᠠᠶ᠋ᠢ ᠲᠠᠭᠠᠷᠠᠨ᠎ᠠ ᠭᠡᠵᠤ ᠪᠤᠳᠤᠨ᠎ᠠ᠃ ᠭᠡᠦᠭᠡᠳ ᠨᠢ ᠵᠦᠪᠭᠡᠨ ᠢᠳᠡᠵᠦ ᠡᠮᠦᠰᠭᠦ ᠳᠡᠭᠡᠨ ᠰᠡᠳᠭᠢᠯ ᠬᠠᠩᠬᠤ ᠦᠭᠡᠢ ᠪᠠᠷ ᠨᠡᠩ ᠲᠡᠭᠡᠳᠦ ᠭᠡᠮᠵᠢᠶᠡᠨ ᠤ ᠡᠳ᠋ ᠪᠠᠶᠠᠯᠢᠭ ᠢ ᠪᠦᠳᠦᠭᠡᠬᠦ ᠪᠠᠷ ᠵᠢᠷᠭᠠᠯ ᠢᠶᠠᠨ ᠪᠤᠯᠭᠠᠪᠠᠯ ᠵᠤᠬᠢᠬᠤ ᠰᠠᠨ ᠭᠡᠵᠤ ᠪᠤᠳᠤᠨ᠎ᠠ᠃ ᠪᠠᠭ᠎ᠠ ᠳᠠᠭᠠᠨ ᠦᠯᠦ᠋ᠰᠴᠦ ᠲᠠᠭᠠᠷᠠᠵᠤ ᠪᠠᠶᠢᠭᠰᠠᠨ ᠵᠦᠢᠯ ᠨᠢ ᠭᠡᠳᠦ᠋ᠪᠡᠷ ᠭᠠᠶᠢᠬᠠᠭᠤᠯᠬᠤ ᠵᠦᠢᠯ ᠪᠢᠰᠢ ᠪᠤᠯᠪᠠᠴᠤ ᠵᠤᠯ ᠵᠢᠷᠭᠠᠯ ᠢ ᠮᠡᠳᠡᠷᠡᠬᠦ ᠳᠤ ᠦᠵᠦᠬᠦᠷ ᠦᠭᠡᠢ ᠲᠤᠰᠠ ᠪᠤᠯᠤᠨ᠎ᠠ ᠭᠡᠵᠤ ᠪᠤᠳᠤᠨ᠎ᠠ᠃ ᠦᠭᠡᠷ᠎ᠡ ᠪᠠᠷ ᠭᠡᠯᠡᠪᠡᠯ ᠵᠤᠯ ᠵᠢᠷᠭᠠᠯ ᠢ ᠰᠤᠬᠤᠷ ᠪᠠᠯᠠᠢ ᠪᠠᠷ ᠬᠦᠭᠡᠭᠡᠴᠡᠯᠳᠦᠬᠦ ᠦᠭᠡᠢ᠂ ᠰᠤᠬᠤᠷ ᠪᠠᠯᠠᠢ ᠪᠠᠷ ᠪᠤᠰᠤᠳ ᠢ ᠲᠠᠭᠠᠵᠤ ᠲᠡᠷᠪᠡᠬᠦ ᠦᠭᠡᠢ ᠪᠠᠶᠢᠪᠠᠯ ᠴᠢᠳᠠᠨ᠎ᠠ ᠭᠡᠵᠤ ᠪᠤᠳᠤᠨ᠎ᠠ᠃ ᠵᠤᠭᠤᠰ ᠢᠶᠠᠷ ᠬᠤᠳᠠᠯᠳᠤᠵᠤ ᠠᠪᠴᠤ ᠲᠠᠶᠢᠯᠬᠦ ᠦᠭᠡᠢ ᠶᠠᠭᠤᠮ᠎ᠠ ᠶᠢ ᠵᠤᠪᠠᠯᠠᠩ ᠢᠶᠠᠷ ᠢᠶᠠᠨ ᠵᠤᠯᠢᠶᠠᠰᠤᠯᠠᠵᠤ ᠠᠪᠴᠤ ᠴᠢᠳᠠᠵᠠᠢ ᠭᠡᠵᠤ ᠪᠤᠳᠤᠨ᠎ᠠ᠃   ᠡᠪᠦᠭᠡᠨ ᠡᠮᠡᠭᠡᠨ ᠬᠤᠶᠠᠭᠤᠯᠠ ᠶᠢ ᠲᠤᠮᠳᠠ ᠲᠡᠰ ᠤᠨ ᠵᠤᠴᠢᠳ ᠪᠠᠭᠤᠳᠠᠯ ᠳᠤ ᠪᠠᠭᠤᠯᠭᠠᠪᠠ᠃ ᠰᠠᠶᠢᠨ ᠳᠤᠨᠢ ᠪᠠᠭᠤᠬᠤ ᠦᠭᠡᠢ ᠭᠡᠬᠦ ᠳᠤ ᠲᠡᠭᠡᠪᠡᠯ ᠮᠠᠭᠤ ᠳᠤᠨᠢ ᠨᠡᠩ ᠪᠠᠭᠤᠵᠤ ᠪᠤᠯᠬᠤ ᠦᠭᠡᠢ ᠭᠡᠳ ᠬᠤᠶᠠᠳᠤᠭᠠᠷ ᠬᠦᠦ ᠨᠢ ᠭᠡᠷᠡᠯᠳᠦᠵᠦ ᠪᠠᠶᠢᠭᠠᠳ ᠪᠤᠳᠤᠭᠰᠠᠨ ᠢᠶᠠᠷ ᠢᠶᠠᠨ ᠪᠤᠯᠭᠠᠪᠠ᠃ ᠡᠪ ᠡᠯᠡᠭᠡᠨ ᠪᠠᠶᠢᠵᠤ ᠪᠠᠶᠢᠭᠰᠠᠭᠠᠷ ᠡᠶᠢᠮᠦ ᠭᠠᠵᠠᠷ ᠢᠷᠡᠵᠦ ᠮᠦᠩᠬᠦ ᠪᠠᠨ ᠦᠷᠡᠵᠦ ᠪᠠᠶᠢᠨ᠎ᠠ ᠭᠡᠵᠤ ᠡᠪᠦᠭᠡᠨ ᠨᠢᠭᠡ ᠰᠦᠨᠢ ᠠᠮᠠ ᠬᠠᠮᠬᠢᠯ ᠦᠭᠡᠢ ᠶᠠᠩᠰᠢᠪᠠ᠃   ᠦᠳᠡ ᠶᠢᠨ ᠡᠮᠦᠨ᠎ᠡ ᠨᠢ ᠬᠤᠳᠠ ᠶᠢᠨ ᠴᠡᠴᠡᠷᠯᠢᠭ ᠢᠶᠠᠷ ᠵᠤᠭᠠᠴᠠᠪᠠ᠃ ᠤᠩᠭᠤᠴᠠ ᠰᠡᠯᠢᠵᠤ ᠪᠠᠷᠠᠭᠠᠳ᠂ ᠲᠤᠤᠷ ᠲᠤ ᠬᠤᠷᠢᠵᠤ ᠪᠠᠶᠢᠭ᠎ᠠ ᠪᠠᠭᠠᠪᠠᠭᠠᠢ᠂ ᠪᠠᠷᠰ ᠢ ᠦᠵᠡᠭᠰᠡᠨ ᠪᠦᠭᠡᠳ ᠵᠤᠬᠢᠶᠠᠮᠠᠯ ᠠᠭᠤᠯᠠᠨ ᠳᠤ ᠬᠤᠷᠢᠭᠳᠠᠵᠤ ᠪᠦᠬᠦᠢ ᠦᠰᠦ ᠨᠤᠤᠰᠤ ᠨᠢ ᠰᠡᠭᠯᠡᠷᠡᠭᠰᠡᠨ ᠲᠤᠷᠠᠩᠬᠠᠢ ᠰᠠᠮᠵᠠ ᠨᠤᠭᠤᠳ ᠢ ᠦᠵᠡᠪᠡ᠃ ᠲᠠᠭᠳᠠᠭ᠎ᠠ ᠲᠡᠵᠢᠭᠡᠬᠦ ᠪᠤᠯᠤᠭᠠᠳ ᠡᠪᠦᠭᠡᠨ ᠪᠠᠭᠠᠨ ᠤᠷᠰᠢᠭ ᠲᠠᠳᠠᠵᠠᠢ᠃ ᠡᠪᠦᠭᠡᠨ ᠵᠠᠪᠠᠯ ᠪᠡᠶ᠎ᠡ ᠳᠡᠭᠡᠨ ᠠᠪᠴᠤ ᠶᠠᠪᠤᠵᠤ ᠪᠠᠶᠢᠭ᠎ᠠ ᠬᠠᠭᠤᠷᠠᠢ ᠪᠤᠳᠠᠭ᠎ᠠ ᠪᠠᠷ ᠢᠶᠠᠨ ᠲᠡᠵᠢᠭᠡᠭᠰᠡᠨ ᠳᠤ ᠠᠵᠢᠯᠳᠠᠨ ᠵᠠᠪᠠᠯ ᠮᠦᠩᠬᠦ ᠪᠠᠷ ᠲᠤᠷᠭᠠᠨ᠎ᠠ ᠭᠡᠪᠡ᠃ ᠭᠡᠷᠪᠡ ᠠᠵᠢᠯᠳᠠᠨ ᠤ ᠭᠠᠷ ᠲᠠᠬᠢ ᠲᠠᠭᠳᠠᠭ᠎ᠠ ᠲᠡᠵᠢᠭᠡᠬᠦ ᠲᠤᠰᠬᠠᠢ ᠪᠤᠷᠳᠤᠭ᠎ᠠ ᠪᠠᠷ ᠲᠠᠵᠢᠭᠡᠭᠰᠡᠨ ᠪᠤᠯ ᠡᠶᠢᠮᠦ ᠶᠠᠪᠤᠳᠠᠯ ᠭᠠᠷᠬᠤ ᠦᠭᠡᠢ ᠪᠠᠶᠢᠯ᠎ᠠ᠃ ᠠᠵᠢᠯᠳᠠᠨ ᠡᠪᠦᠭᠡᠨ ᠢ ᠠᠶᠤᠯᠭᠠᠵᠤ ᠴᠡᠴᠡᠷᠯᠢᠭ ᠤᠨ ᠬᠠᠮᠢᠶᠠᠷᠤᠯᠳᠠ ᠶᠢᠨ ᠭᠠᠵᠠᠷ ᠵᠠᠭᠠᠯᠳᠤᠨ᠎ᠠ ᠭᠡᠪᠡ᠃ ᠡᠪᠦᠭᠡᠨ ᠵᠦᠭᠡᠯᠡᠷᠡᠵᠦ ᠮᠦᠩᠬᠦ ᠪᠠᠨ ᠲᠦᠯᠦ᠋ᠭᠰᠡᠨ ᠪᠤᠯᠪᠠᠴᠤ ᠲᠤᠳᠤᠷ᠎ᠠ ᠪᠠᠨ ᠶᠠᠭ ᠲᠤᠭᠤᠭᠰᠠᠨ ᠦᠭᠡᠢ᠃ ᠵᠠᠯᠠᠭᠤ ᠳᠠᠭᠠᠨ ᠡᠪᠦᠭᠡᠨ ᠪᠠᠷᠢᠭᠠᠳᠠ ᠶᠢᠨ ᠲᠠᠷᠤᠭ᠎ᠠ ᠪᠠᠨ ᠭᠡᠳᠦᠢ ᠤᠳᠠᠭ᠎ᠠ ᠵᠦᠷᠢᠬᠦᠯᠦ᠋ᠭᠰᠡᠨ ᠪᠤᠯ ᠲᠡᠳᠦᠢ ᠤᠳᠠᠭ᠎ᠠ ᠭᠡᠢ ᠢᠳᠡᠭᠰᠡᠨ ᠦᠩᠭᠡᠷᠡᠯᠳᠡ ᠲᠠᠢ ᠬᠦᠮᠦᠨ᠃ ᠶᠡᠭᠡ ᠦᠬᠢᠨ ᠨᠢ ᠠᠷᠠᠳ ᠠᠴᠠ ᠡᠷᠬᠢᠯᠡᠭᠰᠡᠨ ᠪᠠᠭᠰᠢ ᠶᠢᠨ ᠰᠢᠯᠭᠠᠯᠳᠠ ᠳᠤ ᠤᠷᠤᠬᠤ ᠬᠢᠷᠢ ᠭᠡᠮ ᠢᠶᠠᠨ ᠠᠯᠳᠠᠭᠠᠳ ᠨᠢᠭᠡ ᠤᠳᠠᠭ᠎ᠠ᠂ ᠲᠠᠷᠢᠶ᠎ᠠ ᠬᠤᠪᠢᠶᠠᠬᠤ ᠳᠤ ᠪᠤᠰᠤᠳ ᠠᠴᠠ ᠢᠯᠡᠬᠦᠦ ᠬᠤᠵᠢᠷᠯᠢᠭ ᠭᠠᠵᠠᠷ ᠬᠤᠪᠢᠶᠠᠵᠤ ᠤᠯᠤᠭᠠᠳ ᠪᠠᠰᠠ ᠨᠢᠭᠡ ᠤᠳᠠᠭ᠎ᠠ᠂ ᠮᠤᠷᠢᠨ ᠲᠡᠷᠭᠡᠴᠢᠨ ᠤ ᠠᠵᠢᠯ ᠢᠶᠠᠨ ᠪᠤᠰᠤᠳ ᠲᠤ ᠪᠤᠯᠢᠶᠠᠭᠳᠠᠭᠠᠳ ᠪᠠᠰᠠ ᠨᠢᠭᠡ ᠤᠳᠠᠭ᠎ᠠ᠂ ᠲᠠᠷᠢᠶᠠᠨ ᠲᠤᠪᠤ ᠰᠠᠬᠢᠬᠤ ᠡᠭᠡᠯᠵᠢᠨ ᠳᠤ ᠪᠤᠰᠤᠳ ᠠᠴᠠ ᠢᠯᠡᠬᠦᠦ ᠭᠡᠭᠡᠷ᠎ᠡ ᠬᠤᠨᠤᠭᠠᠳ ᠮᠥᠨ ᠨᠢᠭᠡ ᠤᠳᠠᠭ᠎ᠠ ᠁
  
ᠢᠷᠡᠯᠲᠡ᠄ ᠦᠪᠦᠷ ᠮᠤᠩᠭᠤᠯ ᠤᠨ ᠦᠪᠡᠷᠲᠡᠭᠡᠨ ᠵᠠᠰᠠᠬᠤ ᠤᠷᠤᠨ ᠤ ᠵᠠᠰᠠᠭ ᠤᠨ ᠤᠷᠳᠤᠨ ᠤ ᠮᠤᠩᠭᠤᠯ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠬᠤᠷᠴᠢᠨ ᠪᠠᠷᠠᠭᠤᠨ ᠭᠠᠷᠤᠨ ᠳᠤᠮᠳᠠᠳᠤ ᠬᠤᠰᠢᠭᠤ ᠬᠤᠳᠠᠯᠳᠤᠭᠠᠴᠢᠨ ᠤᠷᠢᠵᠤ ᠪᠡᠯᠡ ᠣᠷᠣᠭᠤᠯᠬᠤ ᠶᠢ ᠁
ᠬᠤᠷᠴᠢᠨ ᠪᠠᠷᠠᠭᠤᠨ ᠭᠠᠷᠤᠨ ᠳᠤᠮᠳᠠᠳᠤ ᠬᠤᠰᠢᠭᠤ ︽ᠪᠦᠯᠬᠦᠮᠳᠡᠯ ᠤᠨ ᠰᠡᠳᠬᠢᠯᠭᠡ ᠶᠢ ᠨᠢᠭᠲᠠᠷᠠᠭᠤᠯᠵᠤ᠂ ᠰᠡᠳᠬᠢᠯ ᠁
ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠣᠷᠣᠨ ᠤ ᠨᠠᠮ ᠤᠨ ᠬᠤᠷᠢᠶ᠎ᠠ ᠶᠢᠨ ᠮᠥᠩᠭᠦᠨ ᠬᠦᠢᠯᠭᠡᠭᠡᠨ ᠤ ᠠᠵᠢᠯ ᠤᠨ ᠬᠤᠷᠠᠯ ᠬᠤᠷᠠᠯᠳᠤᠪᠠ
ᠬᠤᠷᠴᠢᠨ ᠪᠠᠷᠠᠭᠤᠨ ᠭᠠᠷᠤᠨ ᠳᠤᠮᠳᠠᠳᠤ ᠬᠤᠰᠢᠭᠤ ᠪᠣᠬᠢᠷᠲᠤᠯ ᠦᠭᠡᠢ ᠰᠢᠨ᠎ᠡ ᠠᠶᠠᠨ ᠳᠤ ᠡᠷᠡᠯᠬᠡᠭᠯᠡᠨ ᠁
ᠬᠤᠷᠴᠢᠨ ᠪᠠᠷᠠᠭᠤᠨ ᠭᠠᠷᠤᠨ ᠳᠤᠮᠳᠠᠳᠤ ᠬᠤᠰᠢᠭᠤ ︽ᠠᠷᠪᠠᠨ ᠰᠢᠶᠠᠨ ᠵᠠᠭᠤᠨ ᠰᠢᠶᠠᠩ ᠮᠢᠩᠭᠠᠨ ᠲᠣᠰᠬᠤᠨ︾ ᠢ ᠁
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号