| — ᠦᠷᠡ ᠪᠤᠯᠭᠠᠨ ᠨᠢ ᠦᠯᠢᠭᠡᠷ ᠲᠠᠢ | ᠦᠨᠡᠨ ᠤ ᠭᠡᠭᠡᠨ ᠲᠤᠶᠠᠭᠠ ᠲᠠᠢ | ᠠᠯᠳᠠᠨ ᠦᠳᠦᠳᠦ ᠰᠢᠪᠠᠭᠤᠳ ᠤᠨ ᠵᠢᠷᠭᠢᠭᠡᠨ ᠳᠤ ᠦᠷ ᠨᠢ ᠮᠠᠩᠬᠠᠶᠢᠵᠦ ᠤᠷᠭᠤᠳᠠᠭ | ᠠᠭᠠᠷ ᠰᠦᠯᠡᠭᠰᠡᠨ ᠡᠷᠭᠡ ᠰᠠᠯᠭᠢᠨ ᠨᠢ ᠠᠳᠤᠭᠤ ᠪᠠᠨ ᠰᠢᠭ ᠦᠤᠷᠰᠡᠵᠦ ᠰᠡᠪᠡᠯᠵᠡᠳᠡᠭ | ᠠᠷᠢᠭᠤᠨ ᠲᠤᠩᠭᠠᠯᠠᠭ ᠭᠤᠤᠯ ᠭᠤᠷᠤᠬᠠ ᠨᠢ ᠴᠤᠭᠤᠷ ᠤᠨ ᠡᠭᠡᠰᠢᠭ ᠰᠢᠭ ᠰᠢᠷᠤᠩᠬᠠᠶᠢᠯᠠᠳᠠᠭ | ︽ᠠᠨᠠᠷ︾ ᠭᠡᠮᠡᠬᠦ ᠢᠷᠠᠭᠤ ᠦᠵᠡᠰᠭᠦᠯᠡᠩ ᠵᠢᠮᠢᠰ ᠤᠨ ᠬᠦᠷᠢᠶᠡᠯᠡᠩ ᠢᠶᠠᠨ ᠪᠢ | ᠠᠮᠤᠷ ᠠᠮᠤᠭᠤᠯᠠᠩ ᠤᠨ ᠤᠷᠤᠨ ᠭᠡᠵᠦ ᠰᠡᠳᠭᠢᠯ ᠳᠡᠭᠡᠨ ᠰᠢᠳᠦᠵᠦ ᠶᠠᠪᠤᠳᠠᠭ | ᠰᠠᠷᠠᠨ ᠠᠴᠠ ᠲᠠᠰᠤᠷᠠᠭᠰᠠᠨ ᠭᠤᠪᠢ ᠶᠢᠨ ᠬᠦᠷᠡᠩ ᠴᠢᠯᠠᠭᠤᠳ ᠨᠢ ᠰᠦᠨᠢᠵᠢᠨ ᠭᠡᠷᠡᠯᠳᠦᠳᠡᠭ | ᠰᠡᠭᠦ᠋ᠵᠦ ᠪᠤᠰᠤᠭᠰᠠᠨ ᠪᠤᠰᠤᠭᠠ ᠠᠭᠤᠯᠠᠰ ᠨᠢ ᠲᠡᠭᠷᠢ ᠪᠠᠨ ᠲᠦᠰᠢᠵᠦ ᠦᠨᠳᠡᠯᠵᠡᠳᠡᠭ | ᠰᠡᠷᠡᠶᠢᠵᠦ ᠤᠷᠭᠤᠭᠰᠠᠨ ᠡᠪᠡᠰᠦ ᠨᠤᠭᠤᠭᠠ ᠨᠢ ᠰᠦ ᠪᠤᠯᠵᠦ ᠠᠰᠬᠠᠷᠠᠳᠠᠭ | ᠰᠡᠩᠭᠢ ᠲᠠᠳᠠᠭᠰᠠᠨ ︽ᠠᠨᠠᠷ︾ ᠭᠡᠮᠡᠬᠦ ᠵᠢᠮᠢᠰ ᠤᠨ ᠬᠦᠷᠢᠶᠡᠯᠡᠩ ᠢᠶᠠᠨ ᠪᠢ | ᠰᠡᠪ ᠦᠭᠡᠢ ᠬᠠᠶᠢᠷᠠ ᠶᠢᠨ ᠭᠤᠯᠤᠮᠳᠠ ᠭᠡᠵᠦ ᠲᠦᠰᠦᠭᠡᠯᠡᠨ ᠪᠤᠳᠤᠳᠠᠭ | ᠨᠠᠪᠴᠢ ᠨᠢ ᠬᠦᠷᠳᠡᠯᠡ ᠨᠡᠷᠡᠨ ᠳᠠᠭᠠᠨ ᠡᠷᠭᠡᠯᠡᠵᠦ ᠦᠭᠡᠳᠡ ᠪᠠᠨ ᠰᠡᠷᠪᠡᠯᠵᠡᠳᠡᠭ | ᠨᠠᠮᠠᠭᠠ ᠨᠢ ᠠᠳᠠᠯᠠ ᠭᠠᠵᠠᠷ ᠢᠶᠠᠨ ᠰᠢᠬᠦᠷᠡᠵᠦ ᠨᠢᠭᠤᠴᠠ ᠪᠠᠨ ᠰᠢᠪᠡᠨᠡᠳᠡᠭ | ᠨᠠᠮᠤᠷ ᠪᠤᠯᠭᠠᠨ ᠢ ᠢᠨᠢᠶᠡᠳᠦ ᠲᠠᠢ ᠤᠭᠳᠤᠵᠦ ᠡᠯᠪᠡᠭ ᠬᠤᠷᠢᠶᠠᠯᠳᠠ ᠪᠠᠷ ᠮᠦᠰᠢᠶᠡᠳᠡᠭ | ᠨᠠᠶᠢᠷᠠᠮᠳᠠᠯ ᠤᠨ ᠰᠦᠭ ᠲᠠᠢ ︽ᠠᠨᠠᠷ︾ ᠭᠡᠮᠡᠬᠦ ᠵᠢᠮᠢᠰ ᠤᠨ ᠬᠦᠷᠢᠶᠡᠯᠡᠩ ᠢᠶᠠᠨ ᠪᠢ | ᠨᠢᠰᠭᠦ ᠬᠦᠭᠵᠢᠯᠳᠡ ᠶᠢᠨ ᠲᠠᠯᠳᠠ ᠬᠦᠴᠦᠨ ᠭᠡᠵᠦ ᠤᠶᠠᠩᠭᠠᠯᠠᠨ ᠲᠠᠭᠤᠯᠠᠳᠠᠭ | ᠡᠭᠡᠯ ᠪᠤᠷᠤᠭᠵᠢᠭᠤᠨ ᠵᠠᠩ ᠴᠢᠨᠠᠷ ᠨᠢ ᠦᠵᠡᠯ ᠤᠬᠠᠮᠰᠠᠷ ᠢ ᠭᠡᠭᠡᠯᠡᠳᠡᠭ | ᠡᠬᠦᠷᠢᠳᠡ ᠬᠤᠪᠢᠷᠠᠳᠠᠭ ᠦᠭᠡᠢ ᠮᠦᠰᠦ ᠨᠢ ᠲᠡᠰᠪᠦᠷᠢ ᠲᠡᠪᠴᠢᠶᠡᠷᠢ ᠶᠢ ᠡᠷᠴᠢᠯᠡᠳᠡᠭ | ᠡᠪᠯᠡᠷᠡᠵᠦ ᠨᠢᠭᠳᠠᠷᠠᠭᠰᠠᠨ ᠤᠯᠠᠨ ᠦᠷᠡ ᠨᠢ ᠬᠦᠰᠡᠯ ᠢᠳᠡᠭᠡᠯ ᠢ ᠢᠷᠯᠡᠳᠡᠭ | ᠡᠰᠡᠨᠢᠯ ᠤᠨ ᠬᠠᠪᠤᠷ ᠲᠠᠢ ︽ᠠᠨᠠᠷ︾ ᠭᠡᠮᠡᠬᠦ ᠵᠢᠮᠢᠰ ᠤᠨ ᠬᠦᠷᠢᠶᠡᠯᠡᠩ ᠢᠶᠠᠨ ᠪᠢ | ᠡᠯᠡ ᠦᠨᠳᠦᠰᠦᠳᠡᠨ ᠪᠦᠯᠬᠦᠮᠳᠡᠨ ᠨᠢᠭᠡᠳᠦᠭᠰᠡᠨ ᠡᠭᠡ ᠤᠷᠤᠨ ᠲᠠᠢ ᠪᠠᠨ ᠵᠦᠢᠷᠯᠡᠳᠡᠭ | ᠬᠠᠩᠬᠤᠯᠤᠭᠰᠠᠨ ᠴᠡᠴᠡᠭ ᠤᠨ ᠭᠢᠨᠢ ᠰᠤᠳᠤᠨ ᠦᠨᠦᠷ ᠲᠦᠷᠪᠡᠨ ᠵᠦᠭ ᠲᠡᠭᠡᠨ ᠠᠩᠭᠢᠯᠳᠠᠭ | ᠬᠤᠤᠰ ᠡᠷᠪᠡᠭᠡᠢ ᠲᠡᠭᠡᠷᠡ ᠨᠢ ᠰᠠᠭᠤᠬᠤ ᠪᠠᠷ ᠠᠮᠢᠳᠤ ᠵᠢᠷᠤᠭ ᠬᠤᠪᠢᠯᠳᠠᠭ | ᠬᠤᠪᠢᠯᠤᠭᠰᠠᠨ ᠵᠢᠷᠤᠭ ᠨᠢ ᠬᠠᠷᠠᠭᠠᠨ ᠳᠤ ᠲᠤᠳᠤᠷᠠᠬᠤ ᠪᠠᠷ ᠵᠢᠷᠦᠭᠡᠨ ᠲᠠᠮᠢᠷ ᠪᠤᠯᠳᠠᠭ | ᠬᠦᠭᠡᠷᠡᠵᠦ ᠬᠠᠯᠭᠢᠯᠠᠭᠰᠠᠨ ︽ᠠᠨᠠᠷ︾ ᠭᠡᠮᠡᠬᠦ ᠵᠢᠮᠢᠰ ᠤᠨ ᠬᠦᠷᠢᠶᠡᠯᠡᠩ ᠢᠶᠠᠨ ᠪᠢ | ᠭᠢᠵᠠᠭᠠᠷ ᠦᠭᠡᠢ ᠮᠦᠷᠦᠭᠡᠳᠦᠯ ᠤᠨ ᠵᠢᠳᠢᠨᠴᠦ ᠭᠡᠮᠡᠨ ᠪᠠᠭᠠᠷᠬᠠᠵᠦ ᠬᠦᠭᠰᠡᠳᠡᠭ᠃ |