| ᠬᠠᠩᠰᠢ ᠨᠡᠭᠡᠭᠡᠯᠡ᠃ ᠨᠡᠭᠡᠭᠡᠭᠰᠡᠨ ᠬᠠᠩᠰᠢ ᠶᠢᠨ ᠣᠷᠢᠨ ᠣᠯᠠᠷᠢᠯ ᠳᠤ ᠨᠡᠯᠦᠭᠡᠷ ᠳᠡᠯᠡᠬᠡᠢ ᠶᠢᠨ ᠠᠮᠢᠰᠬᠤᠭᠠ | ᠬᠦᠮᠦᠨ ᠤ ᠰᠡᠳᠭᠢᠯ ᠢ ᠳᠣᠯᠠᠭᠠᠯᠠᠨ ᠢᠷᠪᠢᠭᠢᠨᠡᠨᠡ᠃ ᠨᠡᠭᠡᠭᠡᠭᠰᠡᠨ ᠬᠠᠩᠰᠢ ᠲᠠᠢ ᠬᠠᠮᠲᠣ ᠬᠠᠭᠤᠴᠢᠨ ᠨᠣᠲᠤᠭ ᠤᠨ | ᠮᠢᠨᠢ ᠰᠠᠯᠬᠢ ᠰᠦᠮᠡᠶᠢᠨ ᠰᠦᠮᠡᠶᠢᠬᠦ ᠬᠦᠬᠡ ᠠᠯᠣᠰ ᠠᠴᠠ ᠰᠡᠪᠡᠯᠵᠡᠨ ᠰᠡᠪᠡᠯᠵᠡᠵᠦ ᠢᠷᠡᠨᠡ᠃ ᠵᠦᠭᠡᠯᠡᠨ ᠰᠠᠯᠬᠢᠨ ᠤ | ᠬᠢᠨᠢ ᠫᠠᠩᠰᠠᠨ ᠦᠵᠦᠭᠦᠷ ᠲᠤᠨᠢ ᠵᠦᠢᠷᠯᠡᠰᠢ ᠦᠭᠡᠢ ᠰᠠᠶᠢᠬᠠᠨ ᠴᠢᠭᠢᠭ ᠰᠢᠷᠣᠢ ᠶᠢᠨ ᠬᠢᠨᠢ ᠦᠨᠦᠷ᠂ ᠴᠡᠪᠡᠷ ᠪᠣᠯᠪᠠᠷᠠᠢ | ᠡᠪᠡᠰᠦ ᠮᠣᠳᠣᠳ ᠤᠨ ᠬᠢᠨᠢ ᠦᠨᠦᠷ᠂ ᠴᠡᠯᠮᠡᠭ ᠴᠡᠩᠭᠡᠭ ᠠᠭᠠᠷ ᠣᠰᠣᠨ ᠤ ᠬᠢᠨᠢ ᠦᠨᠦᠷ ᠁ ᠰᠡᠩᠭᠢ ᠲᠠᠲᠠᠬᠤ | ᠰᠢᠭ ᠬᠦᠷᠴᠦ ᠢᠷᠡᠭᠡᠳ ᠬᠠᠴᠠᠷ ᠨᠢᠭᠤᠷ ᠢ᠂ ᠬᠠᠯᠠᠭᠤᠨ ᠵᠢᠷᠦᠬᠡ ᠶᠢ ᠦᠨᠦᠰᠭᠦ ᠳᠤ ᠬᠤᠯᠠ ᠶᠢᠨ ᠪᠠᠷᠠ ᠬᠠᠷᠠᠭᠠᠨ | ᠦᠵᠦᠭᠦᠷ ᠲᠤ ᠪᠦᠷᠲᠦᠯᠵᠡᠨᠡ᠃ ᠬᠠᠨ ᠳᠡᠯᠡᠬᠡᠢ ᠡᠪᠦᠯ ᠤᠨ ᠴᠢᠯᠡᠭᠡ ᠪᠠᠨ ᠲᠠᠶᠢᠯᠬᠤ ᠮᠡᠲᠦ ᠡᠶᠡᠪᠡᠷᠭᠦᠦ ᠵᠦᠭᠡᠯᠡᠨ | ᠨᠠᠷᠠᠨ ᠤ ᠭᠡᠷᠡᠯ ᠡᠲᠡᠭᠡᠳ ᠰᠢᠨᠡᠬᠡᠨ ᠠᠮᠢᠰᠬᠤᠯ ᠳᠣᠮᠳᠠ ᠬᠠᠮᠤᠭ ᠴᠣᠭᠴᠠᠰ ᠢᠶᠠᠨ ᠰᠣᠨᠢᠶᠠᠬᠤ ᠳᠤ ᠠᠭᠤᠯᠠᠰ ᠣᠯᠠᠮ | ᠬᠤᠯᠠᠳᠠᠵᠣ᠂ ᠲᠠᠯᠠ ᠣᠯᠠᠮ ᠲᠡᠶᠢᠢᠨᠡ᠃ ᠬᠠᠷᠠ ᠳᠠᠷᠣᠭᠰᠠᠨ ᠰᠢᠭ ᠬᠠᠷᠠᠩᠭᠤᠢ ᠬᠢᠵᠢᠭ ᠳᠦᠷᠢᠨ ᠢᠷᠡᠵᠦ ᠬᠠᠮᠤᠭ | ᠬᠦᠮᠦᠰ ᠤᠨ ᠬᠠᠶᠢᠷᠠᠯᠠᠵᠣ ᠬᠢᠮᠠᠭᠠᠳᠠᠵᠣ ᠶᠠᠪᠣᠭᠰᠠᠨ ᠠᠮᠢ ᠨᠠᠰᠣᠨ ᠤ ᠬᠢᠨᠢ ᠭᠤᠷᠪᠠᠨ ᠵᠢᠯ ᠢ ᠴᠦᠯᠪᠡᠨ ᠠᠪᠣᠭᠠᠳ | ᠠᠯᠢᠮᠠᠳ ᠵᠢᠷᠲᠢᠨᠴᠦ ᠶᠢᠨ ᠲᠣᠭᠤᠰᠣᠨ ᠬᠢᠭᠡᠳ ᠠᠶᠣᠮᠰᠢᠭ ᠦᠭᠡᠢ ᠴᠠᠭ ᠤᠨ ᠬᠤᠭᠤᠰᠤᠨ ᠣᠷᠣᠭᠤ ᠪᠠᠷᠠ ᠲᠣᠷᠣ | ᠦᠭᠡᠢ ᠠᠷᠢᠯᠵᠠᠢ᠃ ᠬᠠᠮᠤᠭ ᠶᠠᠭᠤᠮᠠ ᠣᠷᠴᠢᠨ ᠣᠯᠠᠷᠢᠵᠣ᠂ ᠬᠠᠮᠤᠭ ᠴᠠᠭ ᠡᠭᠡᠯᠵᠢᠯᠡᠨ ᠡᠷᠭᠢᠬᠦ ᠶᠢᠨ ᠮᠦᠩᠬᠡ ᠶᠢᠨ | ᠵᠢᠮᠡ ᠪᠠᠷ ᠭᠤᠷᠪᠠᠨ ᠵᠢᠯ ᠤᠨ ᠳᠠᠷᠠᠭᠠᠬᠢ ᠡᠨᠡ ᠬᠠᠩᠰᠢ ᠡᠩ ᠦᠷᠭᠡᠨ ᠠᠷᠣ ᠭᠠᠵᠠᠷ ᠤᠨ ᠬᠦᠷᠦᠰᠦᠨ ᠳᠡᠭᠡᠨ | ᠡᠪᠦᠷ ᠢᠶᠠᠨ ᠳᠡᠯᠭᠡᠵᠦ ᠡᠩᠬᠡ ᠮᠡᠨᠳᠦᠬᠡᠨ ᠮᠣᠷᠢᠯᠠᠭᠰᠠᠨ ᠠᠪᠠᠢ᠃ | ᠡᠨᠡ ᠵᠢᠯ ᠤᠨ ᠬᠠᠩᠰᠢ ᠪᠠᠷ ᠨᠣᠲᠤᠭ ᠲᠠᠭᠠᠨ ᠬᠠᠷᠢᠨᠠ᠃ ᠡᠷᠭᠢᠵᠦ ᠬᠡᠵᠢᠶᠡᠳᠡ ᠨᠦᠬᠦᠵᠦ ᠴᠢᠳᠠᠰᠢ ᠦᠭᠡᠢ ᠴᠠᠭ | ᠮᠦᠴᠡ ᠶᠢᠨ ᠳᠠᠯᠠᠨ ᠴᠣᠭᠤᠷᠬᠠᠢ ᠶᠢᠨ ᠲᠦᠯᠦᠭᠡᠨᠡ ᠪᠣᠰᠣ᠂ ᠡᠮᠲᠡᠷᠡᠵᠦ ᠦᠨᠢᠳᠡ ᠪᠣᠯᠣᠰᠢ ᠦᠭᠡᠢ ᠡᠯᠢᠭᠡᠨ | ᠬᠠᠶᠢᠷᠠ ᠶᠢᠨ ᠣᠴᠢᠷᠠ ᠡᠬᠡ ᠨᠣᠲᠤᠭ ᠤᠨ ᠢᠶᠠᠨ ᠲᠡᠷᠡ ᠬᠡᠰᠡᠭ ᠬᠠᠯᠠᠭᠤᠨ ᠰᠢᠷᠣᠢ ᠳᠡᠭᠡᠷᠡ ᠦᠷᠭᠦᠯᠵᠢᠳᠡ ᠬᠦᠷᠦᠨᠡᠮ | ᠃ ᠡᠴᠢᠭᠡ ᠡᠬᠡ ᠶᠢᠨ ᠮᠢᠨᠢ ᠶᠠᠰᠣ ᠶᠢ ᠪᠣᠩᠬᠤᠯᠠᠭᠰᠠᠨ ᠠᠷᠢᠭᠤᠨ ᠡᠨᠡ ᠰᠢᠷᠣᠢ ᠳᠡᠭᠡᠷᠡ ᠨᠢ ᠠᠩᠭᠠᠬᠠᠢ ᠪᠠᠭᠠ ᠶᠢᠨ | ᠨᠠᠰᠣ ᠪᠠᠨ ᠪᠢ ᠦᠨᠢ ᠡᠭᠦᠷᠢᠳᠡ ᠣᠷᠬᠢᠭᠠᠳ ᠭᠠᠷᠴᠣ ᠢᠷᠡᠭᠰᠡᠨ ᠶᠣᠮ ᠪᠢᠯᠡ᠃ ᠣᠷᠭᠤᠮᠠᠯ ᠠᠮᠢᠲᠠᠨ ᠪᠢᠰᠢ | ᠬᠢᠷᠢᠨᠡ ᠪᠠᠨ ᠬᠦᠮᠦᠨ ᠲᠡᠷᠢᠭᠦᠲᠡᠨ ᠣᠷᠭᠤᠵᠣ ᠲᠦᠯᠵᠢᠭᠰᠡᠨ ᠭᠠᠵᠠᠷ ᠢᠶᠠᠨ ᠬᠠᠲᠠᠵᠣ ᠬᠤᠪᠠᠭᠠᠶᠢᠷᠠᠵᠣ ᠦᠯᠦ | ᠪᠣᠯᠣᠨᠠ ᠭᠡᠪᠡ ᠦᠦ᠂ ᠣᠮᠳᠠᠯᠠᠵᠣ ᠪᠤᠶᠢᠵᠢᠭᠰᠠᠨ ᠣᠰᠣᠨ ᠳᠠᠭᠠᠨ ᠣᠨᠲᠠᠷᠠᠵᠣ ᠪᠦᠬᠦᠵᠦ ᠡᠰᠡ ᠪᠣᠯᠣᠨᠠ ᠭᠡᠪᠡ ᠦᠦ᠃ | ᠠᠶᠠ᠂ ᠭᠡᠨᠡᠳᠲᠡ ᠣᠯᠣᠭᠰᠠᠨ ᠶᠠᠯᠢᠮ ᠦᠭᠡᠢ ᠦᠴᠦᠬᠡᠨ ᠡᠨᠡ ᠠᠮᠢ ᠨᠠᠰᠤᠨ ᠤ ᠪᠠᠨ ᠦᠷᠭᠡᠴᠡ ᠶᠢ ᠲᠡᠯᠡᠬᠦ ᠭᠡᠵᠦ | ᠵᠢᠳᠭᠦᠨ᠂ ᠶᠡᠷᠦ ᠠᠴᠠ ᠬᠤᠭᠤᠰᠣᠨ ᠶᠡᠭᠡ ᠠᠮᠢᠳᠣᠷᠠᠯ ᠤᠨ ᠣᠳᠭᠠ ᠠᠭᠤᠯᠭᠠ ᠶᠢ ᠡᠭᠦᠳᠬᠦ ᠭᠡᠵᠦ ᠮᠠᠬᠠᠷᠠᠨ᠂ | ᠬᠦᠮᠦᠨ ᠶᠡᠷᠦ ᠨᠢ ᠣᠨᠠᠭᠰᠠᠨ ᠰᠢᠷᠣᠢ ᠣᠣᠭᠤᠭᠰᠠᠨ ᠣᠰᠣᠨ ᠠᠴᠠ ᠪᠠᠨ ᠰᠠᠯᠵᠣ ᠶᠠᠪᠣᠳᠠᠭ ᠨᠢᠭᠡᠨ ᠶᠣᠰᠣᠨ ᠲᠡᠷᠡ | ᠪᠦᠯᠦᠭᠡ᠃ ᠭᠡᠶᠡ᠂ ᠵᠢᠯ ᠪᠦᠷᠢ ᠶᠢᠨ ᠬᠠᠪᠣᠷ ᠰᠠᠭᠠᠲᠠᠵᠣ ᠬᠠᠩᠰᠢ ᠨᠡᠭᠡᠭᠡᠭᠰᠡᠭᠡᠷ ᠯᠡ ᠬᠠᠮᠢᠭᠠ ᠬᠤᠯᠠ ᠶᠢᠨ ᠲᠡᠷᠡ | ᠬᠡᠰᠡᠭ ᠰᠢᠷᠣᠢ ᠬᠠᠷᠠᠩᠭᠤᠢ ᠰᠦᠨᠢ ᠶᠢᠨ ᠵᠡᠭᠦᠳᠦ ᠶᠢ ᠦᠢᠮᠡᠭᠦᠯᠵᠦ ᠬᠠᠷᠠ ᠡᠳᠦᠷ ᠤᠨ ᠪᠣᠳᠣᠯ ᠢ ᠦᠢᠮᠦᠷᠡᠭᠤᠯᠵᠣ | ᠢᠷᠡᠨᠡ᠃ | ᠠᠯᠪᠠᠨ ᠰᠢᠷᠡᠭᠡ ᠡᠯᠢᠭᠡᠳᠡᠵᠦ ᠺᠣᠮᠫᠢᠦ᠋ᠲ᠋ᠧᠷ ᠤᠨ ᠲᠠᠷᠣᠪᠴᠢ ᠲᠠᠢ ᠨᠣᠣᠷᠠᠭᠰᠠᠭᠠᠷ ᠠᠲᠠᠯᠠ ᠺᠣᠹᠧ ᠣᠣᠭᠤᠬᠤ ᠵᠠᠪ | ᠦᠭᠭᠦᠯ ᠦᠭᠡᠢ ᠬᠤᠨᠤᠭ ᠡᠳᠦᠷ ᠤᠳ ᠣᠷᠣᠰᠴᠣ ᠬᠤᠯᠠᠳᠠᠨᠠ᠂ ᠠᠵᠢᠯ ᠬᠢᠳᠡᠯ ᠭᠡᠵᠦ ᠮᠣᠩᠭᠢᠨᠠᠭᠰᠠᠭᠠᠷ ᠪᠠᠶᠢᠲᠠᠯᠠ | ᠠᠮᠢᠳᠣ ᠶᠢᠨ ᠣᠳᠭᠠ ᠶᠢ ᠰᠡᠳᠭᠢᠬᠦ ᠴᠢᠯᠦᠭᠡ ᠦᠭᠭᠦᠯ ᠦᠭᠡᠢ ᠣᠨ ᠵᠢᠯ ᠤᠳ ᠰᠢᠭᠤᠷᠴᠣ ᠣᠳᠣᠨᠠ᠃ ᠬᠦᠮᠦᠰ | ᠠᠵᠢᠯ ᠬᠢᠳᠡᠭ ᠪᠠᠭᠠᠵᠢ ᠪᠣᠯᠣᠨᠠ᠂ ᠪᠠᠭᠠᠵᠢ ᠳᠠᠭᠠᠨ ᠠᠵᠢᠯ ᠬᠢᠵᠦ ᠦᠭᠳᠡᠭ ᠪᠣᠭᠤᠯ ᠪᠣᠯᠣᠨᠠ᠂ ᠲᠡᠶᠢᠨ ᠪᠠᠶᠢᠬᠰᠠᠭᠠᠷ | ᠬᠦᠮᠦᠨ ᠦᠪᠡᠷ ᠢ ᠪᠠᠨ ᠠᠯᠳᠠᠨᠠ᠂ ᠦᠪᠡᠷ ᠢ ᠪᠠᠨ ᠮᠠᠷᠲᠠᠨᠠ᠃ ᠬᠠᠷᠢᠨ ᠪᠠᠰᠠ ᠣᠷᠢᠳᠣ ᠡᠮᠦᠨᠡ ᠪᠠᠶᠢᠭᠠ ᠦᠭᠡᠢ | ᠪᠣᠳᠠᠰ ᠤᠨ ᠬᠦᠰᠡᠯ ᠬᠢᠭᠡᠳ ᠬᠡᠷᠡᠭᠯᠡᠭᠡ ᠶᠢᠨ ᠰᠢᠨᠣᠯ ᠨᠢᠳᠣ ᠦᠭᠡᠢ ᠰᠢᠭᠤᠷᠣᠭᠰᠠᠨ ᠦᠨᠦᠳᠦᠷ ᠬᠦᠮᠦᠰ ᠦᠵᠡᠭᠳᠡᠵᠦ | ᠬᠠᠷᠠᠭᠳᠠᠬᠤ ᠭᠠᠳᠠᠭᠠᠳᠣ ᠵᠢᠷᠲᠢᠨᠴᠦ ᠶᠢᠨ ᠵᠤᠭᠠ ᠴᠡᠩᠭᠡᠯ ᠳᠤ ᠲᠠᠰᠢᠭᠤᠷᠠᠨ ᠬᠠᠨᠣᠵᠣ ᠣᠶᠣᠨ ᠪᠢᠯᠢᠭ ᠢᠶᠠᠨ ᠠᠯᠳᠠᠨᠠ | ᠂ ᠣᠶᠣᠨ ᠰᠠᠨᠠᠭᠠ ᠨᠢ ᠬᠤᠭᠤᠰᠣᠷᠠᠨᠠ᠃ ᠦᠩᠭᠡᠪᠴᠢ ᠵᠢᠷᠲᠢᠨᠴᠦ ᠶᠢᠨ ᠪᠣᠳᠠᠰᠯᠢᠭ ᠬᠦᠰᠡᠯ ᠰᠢᠨᠣᠯ ᠳᠤ | ᠣᠷᠢᠶᠠᠭᠳᠠᠬᠤ ᠲᠣᠲᠣᠮ ᠢᠶᠠᠨ ᠬᠦᠮᠦᠰ ᠠᠮᠢᠨᠴᠢᠷ ᠬᠠᠷᠠᠮᠴᠢ ᠪᠣᠯᠣᠨᠠ᠂ ᠣᠶᠢᠪᠣᠷᠭᠠᠨ ᠭᠦᠶᠦᠬᠡᠨ ᠪᠣᠯᠣᠨᠠ᠃ | ᠬᠦᠮᠦᠨ ᠭᠡᠭᠴᠢ ᠠᠵᠢᠯ ᠡᠭᠦᠷᠭᠡ ᠯᠡ ᠭᠦᠢᠴᠡᠳᠭᠡᠳᠡᠭ ᠬᠦᠢᠲᠡᠨ ᠲᠡᠮᠦᠷ ᠬᠦᠯᠳᠡᠭᠦᠦ ᠪᠠᠭᠠᠵᠢ ᠪᠢᠰᠢ ᠬᠤᠶᠢᠨᠠ | ᠣᠰᠣᠨ ᠨᠢᠳᠣ ᠴᠢᠰᠣᠨ ᠵᠢᠷᠦᠬᠡ ᠲᠠᠢ ᠠᠮᠢᠳᠣ ᠣᠷᠣᠰᠢᠬᠤᠢ ᠪᠠᠶᠢᠵᠣ ᠲᠠᠭᠠᠷᠠᠨᠠ᠃ ᠬᠦᠮᠦᠨ ᠭᠡᠭᠴᠢ ᠮᠠᠬᠠᠪᠣᠳ ᠤᠨ | ᠬᠦᠰᠡᠯ ᠳᠡᠭᠡᠨ ᠯᠡ ᠬᠦᠲᠦᠯᠦᠭᠳᠡᠭᠰᠡᠨ ᠮᠠᠩᠭᠤᠷ ᠠᠮᠢᠲᠠᠨ ᠪᠢᠰᠢ ᠭᠠᠵᠠᠷ᠂ ᠬᠦᠰᠡᠯᠡᠩ ᠬᠠᠶᠢᠷᠠ ᠣᠳᠭᠠ | ᠠᠭᠤᠯᠭᠠ ᠶᠢᠨ ᠣᠷᠣᠰᠢᠬᠤᠢ ᠪᠣᠯᠵᠣ ᠲᠠᠭᠠᠷᠠᠨᠠ᠃ | ᠡᠨᠡ ᠵᠢᠯ ᠤᠨ ᠬᠠᠩᠰᠢ ᠪᠠᠷ ᠨᠣᠲᠤᠭ ᠲᠠᠭᠠᠨ ᠬᠠᠷᠢᠨᠠ᠃ ᠡᠭᠡᠴᠢ ᠪᠠᠨ ᠡᠷᠭᠢᠨᠡ᠂ ᠠᠬᠠ ᠪᠠᠨ ᠪᠣᠯᠭᠤᠭᠠᠨᠠ᠃ | ᠬᠠᠮᠠᠷ ᠲᠠᠭᠠᠨ ᠨᠢᠰᠣ ᠲᠠᠢ ᠬᠠᠷᠠᠬᠠᠨ ᠪᠠᠭᠠ ᠶᠢᠨ ᠨᠠᠰᠣᠨ ᠠᠴᠠ ᠬᠠᠮᠲᠣ ᠭᠦᠶᠦᠭᠰᠡᠭᠡᠷ ᠦᠰᠦᠭᠰᠡᠨ — | ᠱᠣᠸᠠᠩᠪᠣᠣ᠂ ᠵᠢᠨᠪᠣᠣ᠂ ᠹᠦᠴᠢᠦᠸᠠᠨ᠂ ᠲᠣᠭᠲᠠᠬᠤ᠂ ᠰᠠᠶᠢᠨᠠ᠂ ᠲᠣᠩᠭᠠ ᠁ ᠪᠠᠭᠠ ᠶᠢᠨ ᠦᠶᠡ ᠶᠢᠨ | ᠨᠠᠶᠢᠵᠠᠰ ᠪᠠᠯᠴᠢᠷ ᠨᠠᠰᠣᠨ ᠤ ᠬᠠᠨᠢᠲᠠᠳ ᠮᠢᠨᠢ ᠠᠭᠤᠣ ᠶᠡᠭᠡ ᠲᠡᠷᠡ ᠰᠢᠷᠣᠢ ᠶᠢ ᠲᠦᠰᠢᠭᠰᠡᠭᠡᠷ ᠠᠮᠥᠷ ᠵᠢᠮᠣᠷ ᠨᠢᠭᠡᠨ | ᠨᠠᠰᠣ ᠶᠢ ᠡᠯᠡᠭᠡᠵᠦ ᠶᠠᠪᠣᠭᠠ ᠨᠢ ᠴᠦ ᠪᠣᠢ᠂ ᠠᠰᠢᠲᠠ ᠶᠢᠨ ᠠᠮᠣᠭᠤᠯᠠᠩ ᠦᠭᠭᠢᠶᠡᠮᠦᠷ ᠡᠨᠡ ᠰᠠᠶᠢᠬᠠᠨ ᠰᠢᠷᠣᠢ | ᠳᠡᠭᠡᠷᠡ ᠪᠠᠰᠠ ᠬᠠᠭ ᠤᠨ ᠨᠠᠭᠤᠷ᠂ ᠬᠢᠶᠠᠭᠲᠣ ᠶᠢᠨ ᠲᠠᠯᠠ᠂ ᠬᠠᠷᠠ ᠡᠷᠭᠢ᠂ ᠬᠠᠷᠠᠭᠠᠨᠠᠲᠣ ᠶᠢᠨ ᠡᠩᠭᠡᠷ᠂ | ᠬᠠᠶᠢᠯᠠᠰᠣᠲᠠᠢ ᠶᠢᠨ ᠲᠦᠩ᠂ ᠪᠠᠵᠠᠢ ᠯᠠᠮᠠ ᠶᠢᠨ ᠬᠤᠲᠣᠭᠤᠷ᠂ ᠪᠣᠷᠭᠠᠰᠣᠲᠠᠢ ᠮᠠᠩᠬᠠ ᠶᠢᠨ ᠬᠦᠲᠦᠯ᠂ ᠬᠠᠷᠠ | ᠲᠠᠩ ᠤᠨ ᠲᠠᠷᠢᠶᠠ᠂ ᠬᠠᠷᠠ ᠣᠰᠣ ᠶᠢᠨ ᠭᠤᠣᠯ ᠁ ᠭᠡᠮᠡᠨ ᠠᠯᠳᠠᠷᠠᠶᠢᠬᠠᠨ ᠨᠠᠰᠣᠨ ᠳᠠᠭᠠᠨ ᠠᠯᠢᠶᠠᠯᠠᠵᠣ | ᠲᠣᠭᠯᠠᠵᠣ ᠶᠠᠪᠣᠭᠰᠠᠨ ᠠᠯᠢ ᠣᠯᠠᠨ ᠦᠯᠢᠭᠡᠷ ᠳᠣᠮᠤᠭ ᠤᠨ ᠭᠠᠵᠠᠷ ᠣᠰᠣᠨ ᠪᠣᠢ᠃ ᠪᠠᠰᠠ ᠬᠠᠭ ᠤᠨ ᠰᠦᠮᠡ᠂ | ᠭᠡᠭᠡᠨ ᠰᠠᠩ᠂ ᠭᠦᠩ ᠤᠨ ᠰᠠᠩ᠂ ᠬᠤᠩᠭᠤᠷ ᠣᠪᠣᠭᠠ᠂ ᠬᠤᠸᠠᠩ ᠤᠨ ᠠᠶᠢᠯ᠂ ᠪᠠᠶᠠᠨ ᠦᠨᠳᠦᠷ᠂ ᠪᠠᠲᠣᠪᠠᠶᠠᠷ ᠤᠨ | ᠲᠣᠪᠤ᠂ ᠴᠠᠶᠢᠳᠠᠮ ᠤᠨ ᠠᠶᠢᠯ᠂ ᠱᠠᠩᠰᠢ ᠶᠢᠨ ᠠᠶᠢᠯ ᠁ ᠭᠡᠮᠡᠨ ᠣᠶᠢᠷᠠᠨ ᠲᠣᠭᠤᠷᠢᠨ ᠤ ᠣᠴᠢᠭᠰᠠᠨ ᠣᠴᠢᠭᠠ | ᠦᠭᠡᠢ ᠠᠮᠢᠰᠬᠤᠯ ᠨᠢᠭᠡᠲᠡᠢ ᠠᠶᠢᠯ ᠣᠰᠣᠨ ᠪᠣᠢ᠃ ᠠᠶᠠ᠂ ᠡᠨᠡ ᠰᠢᠷᠣᠢ ᠳᠡᠭᠡᠷᠡ ᠮᠢᠨᠦ ᠬᠠᠶᠢᠷᠠᠯᠠᠵᠣ ᠬᠤᠷᠭᠤᠳᠠᠬᠤ | ᠬᠢᠮᠠᠭᠠᠳᠠᠵᠣ ᠲᠠᠲᠠᠭᠳᠠᠬᠤ ᠵᠦᠢᠯᠡᠰ ᠳᠠᠩᠴᠣ ᠣᠯᠠᠨ ᠠᠵᠢᠶᠠᠨᠠᠮ᠂ ᠴᠡᠭᠡᠵᠢᠯᠡᠯ ᠤᠨ ᠭᠦᠨ ᠳᠠᠬᠢ ᠴᠡᠪᠡᠷ ᠴᠠᠶᠢᠯᠭᠠᠨ | ᠦᠯᠢᠭᠡᠷ ᠳᠣᠷᠠᠳᠬᠠᠯ ᠤᠳ ᠢ ᠡᠳᠦᠭᠡ ᠨᠢᠭᠡᠳ ᠨᠢᠭᠡ ᠪᠠᠷ ᠳᠠᠬᠢᠨᠲᠠ ᠠᠰᠠᠭᠠᠬᠤ ᠳᠤ ᠣᠢ ᠰᠡᠳᠭᠢᠯ ᠭᠡᠷᠡᠯᠲᠦᠵᠦ | ᠣᠬᠠᠭᠠ ᠵᠢᠷᠣᠬᠡ ᠨᠢᠯᠬᠠᠷᠠᠨᠠ᠃ | ᠲᠡᠶᠢᠮᠦ ᠡ᠂ ᠠᠷᠢᠯᠣᠭᠰᠠᠨ ᠬᠢᠵᠢᠭ ᠠᠷᠴᠢᠭᠰᠠᠨ ᠲᠡᠭᠷᠢ ᠰᠢᠭ ᠴᠡᠯᠮᠡᠶᠢᠭᠰᠡᠨ ᠡᠨᠡ ᠬᠠᠪᠣᠷ ᠠᠮᠢᠨ ᠬᠠᠶᠢᠷᠠᠲᠠᠢ | ᠮᠢᠨᠦ ᠮᠠᠭᠤ ᠭᠠᠭᠴᠠ ᠦᠬᠢᠨ ᠠᠯᠢ ᠬᠤᠯᠠ ᠠᠷᠠᠯ ᠤᠨ ᠲᠡᠷᠡ ᠣᠯᠣᠰ ᠠᠴᠠ ᠠᠮᠠᠷᠠᠯᠲᠠ ᠶᠢᠨ ᠴᠢᠯᠦᠭᠡ ᠪᠠᠨ | ᠠᠪᠣᠭᠠᠳ ᠬᠠᠪᠣᠷ ᠲᠠᠢ ᠬᠠᠮᠲᠣ ᠢᠷᠡᠭᠰᠡᠨ ᠪᠠᠶᠢᠯᠠ᠃ ᠬᠠᠪᠣᠷ ᠨᠢ ᠬᠠᠷᠢᠶᠠᠴᠠᠢ ᠶᠢᠨ ᠬᠤᠶᠠᠷ ᠵᠢᠭᠦᠷ ᠲᠠᠢ ᠢᠷᠡᠭᠰᠡᠨ᠂ | ᠬᠤᠶᠠᠷ ᠵᠢᠭᠦᠷ ᠨᠢ ᠠᠮᠢᠯᠠᠯ ᠡᠰᠡᠨᠢᠯ᠂ ᠠᠯᠢᠪᠠ ᠰᠠᠶᠢᠨ ᠰᠠᠶᠢᠬᠠᠨ ᠲᠠᠢ ᠴᠤᠭ ᠢᠷᠡᠭᠰᠡᠨ᠂ ᠠᠷᠣ ᠠᠴᠠ ᠨᠢ ᠡᠨᠡ | ᠵᠢᠯ ᠤᠨ ᠬᠠᠩᠰᠢ ᠠᠶᠢᠪᠣᠭᠤ ᠲᠠᠶᠢᠪᠣᠭᠤᠬᠠᠨ ᠶᠠᠪᠣᠵᠣ ᠢᠷᠡᠭᠰᠡᠨ ᠠᠵᠢ᠃ ᠬᠠᠩᠰᠢ ᠶᠢᠨ ᠬᠤᠶᠢᠨᠠ ᠠᠴᠠ ᠨᠢ | ᠬᠠᠮᠤᠭ ᠤᠨ ᠲᠠᠩᠰᠤᠭ ᠭᠤᠶᠣᠯᠠᠯ ᠢᠶᠠᠨ ᠬᠡᠲᠡᠷᠦᠭᠰᠡᠨ ᠬᠠᠩᠭᠠᠢ ᠶᠢᠨ ᠵᠣᠨ ᠬᠠᠩᠬᠠᠯᠵᠠᠨ ᠠᠯᠬᠤᠯᠠᠭᠰᠠᠭᠠᠷ ᠠᠶᠠᠷ | ᠠᠶᠠᠷᠬᠠᠨ ᠣᠶᠢᠷᠠᠳᠴᠣ ᠠᠶᠢᠰᠣᠢ᠃ | ᠬᠠᠩᠰᠢ ᠨᠡᠭᠡᠭᠡᠯᠡ᠃ ᠨᠡᠭᠡᠭᠡᠭᠰᠡᠨ ᠬᠠᠩᠰᠢ ᠶᠢᠨ ᠶᠧᠯᠸᠢᠲᠣ ᠡᠭᠦᠳᠡ ᠪᠠᠷ ᠨᠢ ᠰᠡᠳᠭᠢᠯᠲᠦ ᠬᠦᠮᠦᠰ ᠦᠩᠭᠡᠷᠡᠭᠰᠡᠨ | ᠴᠠᠭ ᠲᠤ ᠬᠦᠷᠦᠨᠡ᠃ ᠦᠩᠭᠡᠷᠡᠭᠰᠡᠨ ᠴᠠᠭ ᠤᠨ ᠲᠣᠲᠣᠨᠣ ᠶᠢᠨ ᠬᠦᠮᠦᠰ᠂ ᠦᠩᠭᠡᠷᠡᠭᠰᠡᠨ ᠴᠠᠭ ᠤᠨ ᠳᠣᠯᠠᠭᠠᠬᠠᠨ | ᠶᠠᠪᠣᠳᠠᠯ ᠤᠳ ᠁ ᠳᠠᠭᠤ ᠦᠭᠡᠢ ᠺᠢᠨᠣ᠋ ᠶᠢᠨ ᠬᠦᠰᠢᠭᠡ ᠮᠡᠲᠦ ᠰᠡᠳᠭᠢᠯ ᠤᠨ ᠠᠬᠤᠢ ᠳᠤ ᠢᠯᠡ ᠠᠴᠠ ᠢᠯᠡ᠂ | ᠲᠣᠳᠣ ᠠᠴᠠ ᠲᠣᠳᠣ᠂ ᠦᠨᠡᠨ ᠠᠴᠠ ᠦᠨᠡᠨ᠃ ᠨᠡᠭᠡᠭᠡᠭᠰᠡᠨ ᠬᠠᠩᠰᠢ ᠶᠢᠨ ᠳᠣᠮᠤᠭ ᠤᠨ ᠬᠠᠭᠠᠯᠭᠠ ᠠᠴᠠ ᠨᠢᠭᠡᠨᠲᠡ | ᠡᠷᠭᠢᠵᠦ ᠨᠠᠭᠠᠰᠢ ᠪᠠᠨ ᠭᠠᠷᠴᠣ ᠢᠷᠡᠬᠦ ᠳᠤ ᠠᠮᠢ ᠠᠮᠢᠵᠢᠷᠠᠯ ᠤᠨ ᠬᠦᠬᠡ ᠣᠨᠢᠶᠠᠷ ᠲᠠᠲᠠᠭᠰᠠᠨ ᠬᠦᠬᠡᠮᠳᠦᠭ | ᠳᠡᠯᠡᠬᠡᠢ ᠳᠤ ᠬᠠᠪᠣᠷ ᠬᠡᠳᠦ᠋ᠨᠡᠢ ᠰᠠᠭᠠᠲᠠᠴᠢᠬᠠᠭᠰᠠᠨ ᠪᠠᠶᠢᠯᠤᠭᠠ᠃ ᠵᠠᠮ ᠤᠨ ᠳᠠᠯᠠᠩ ᠠᠳᠡ ᠲᠡᠨᠳᠡ ᠬᠦᠬᠡᠷᠡᠬᠦ ᠠᠭᠠᠳ | ᠵᠠᠬᠠ ᠶᠢᠨ ᠣᠢ᠂ ᠵᠢᠭᠦᠷ ᠤᠨ ᠣᠰᠣᠨ ᠳᠤ ᠰᠢᠪᠠᠭᠤ ᠪᠣᠯᠵᠣᠮᠣᠷ ᠬᠠ ᠶᠠ ᠦᠭᠡᠢ ᠱᠣᠯᠣᠭᠠᠨᠠᠵᠣ᠂ ᠬᠦᠮᠦᠨ ᠤ | ᠣᠷᠮᠠ ᠶᠢ ᠭᠠᠯ ᠬᠠᠯᠠᠭᠤᠨ ᠠᠮᠢᠳᠣᠷᠠᠯ ᠣᠷᠣᠭᠤ ᠬᠦᠲᠦᠯᠦᠭᠰᠡᠨ ᠰᠢᠳᠢᠲᠦ ᠶᠡᠭᠡ ᠪᠠᠶᠢᠭᠠᠯᠢ᠂ ᠬᠦᠰᠡᠯᠡᠩ ᠤᠨ | ᠰᠠᠶᠢᠬᠠᠨ ᠢ ᠵᠢᠷᠦᠬᠡ ᠵᠢᠷᠦᠬᠡᠨ ᠳᠤᠨᠢ ᠲᠠᠷᠢᠨᠠ᠃ | ᠡᠨᠡ ᠵᠢᠯ ᠤᠨ ᠬᠠᠩᠰᠢ ᠪᠠᠷ ᠨᠣᠲᠤᠭ ᠲᠠᠭᠠᠨ ᠬᠠᠷᠢᠨᠠ᠃ | ᠮᠠᠰᠢᠨ ᠳᠠᠭᠠᠨ ᠲᠣᠰᠣ ᠶᠢ ᠨᠢ ᠨᠡᠮᠡᠭᠡᠳ ᠲᠠᠯᠪᠢᠶᠠ᠂ ᠰᠡᠳᠭᠢᠯ ᠳᠡᠭᠡᠨ ᠢᠯᠴᠢ ᠶᠢ ᠨᠢ ᠨᠡᠮᠡᠭᠡᠳ ᠣᠨᠲᠠᠶᠠ᠂ | ᠮᠠᠷᠭᠠᠰᠢ ᠦᠷᠯᠦᠭᠡ ᠡᠷᠲᠡ ᠰᠢᠭ ᠬᠦᠳᠡᠯᠦᠶᠡ᠃ | |